У рэйтынгу найбольш знакавых недахопаў асіповіцкай «сацыялкі” апошнія паўтара дзясятка гадоў лідзіруе раённая бальніца, дакладней — нязручнасць і састарэласць яе лячэбных карпусоў. Але сёння ўжо відавочна, што гісторыя пераадолення гэтага «вузкага месца” паступова набліжаецца да станоўчага выніку.

 Праект прадугледжвае будаўніцтва новага 5-павярховага тэрапеўтычнага корпуса (адзін паверх падземны, другі — паўпадземны) і ўсёй патрэбнай інфраструктуры: асобнага блока для прыгатавання ежы, гаража, сучасных камунікацый і г.д. Будуць у ім кафэ, ліфты і свой падземны ход — для хуткай дастаўкі ежы с харчаблока да пацыентаў.

Новы тэрапеўтычны корпус разлічаны на 100 ложкаў і ўключае некалькі аддзяленняў: дзіцячае, кардыялагічнае, неўралагічнае, тэрапеўтычнае. Узгаданая колькасць лячэбных месцаў вызначана зыходзячы з дэмаграфічнай дынамікі, але насамрэч праектная лічба азначае далёка не максімальную загрузку: палаты такія прасторныя, што без пагаршэння ўмоў існавання пацыентаў колькасць ложкаў у іх можа быць павялічана ледзь не на трэць.

Пасля пераезду тэрапеўтычнага аддзялення ў новы будынак корпус былой чыгуначнай бальніцы па вуліцы Ленінскай будзе перададзены ў камунальную маёмасць, а інфекцыйнае аддзяленне зойме выслабанены будынак сённяшняга дзіцячага аддзялення.

Тэндар на правядзенне будаўнічых работ выйграла ДУКВП «Водаканал”. Камунальнікі прыступілі да справы восенню 2010 года, але першапачаткова тэмпы работ былі не вельмі шпаркімі — фінансаванне новабудоўлі ішло толькі з райбюджэту. Да канца таго года было асвоена каля 400 мільёнаў рублёў, у наступным аб’ём узрос да 2,8 мільярда. А вось летась, калі нарэшце наша бальніца ўвайшла ў абласны спіс прыярытэтных будаўнічых аб’ектаў, сума «ўзляцела” да 10 мільярдаў — такія інвестыцыі ў капітальнае будаўніцтва медыцынскага прызначэння былі
самымі высокімі на Магілёўшчыне.

Як паведаміў дырэктар прадпрыемства—падрадчыка Iгар Трацяк, на сёння выканана каля 25% ад прадугледжанага праектам аб’ёму работ. Цалкам завершаны мантаж першага пускавога комплексу, які ўключае інжынерныя сеткі і падземныя камунікацыі. Другі — гараж і блок для прыгатавання ежы — будзе здадзены
ў другім квартале гэтага года.

Па трэцім комплексе, ці ўласна лячэбным корпусе, сітуацыя больш складаная: з ужо закупленых
матэрыялаў можна пабудаваць тры паверхі.

Што ж тычыцца канкрэтных тэрмінаў завяршэння будаўніцтва, то пакуль дакладна можна сказаць
адно: сёлета медыкі наваселле спраўляць не будуць. Нават пры самых спрыяльных умовах —  поўнамаштабным і рэгулярным фінансаванні — скончыць усе будаўнічыя работы атрымаецца толькі ў 2014 годзе.