Чалавек сутыкаецца з выбарам кожны дзень. Аднак выбар, які робіш адначасова з усёй Радзімай, напэўна, самы хвалюючы і адказны, асабліва калі гэта адбываецца ўпершыню. Напярэдадні адзінага дня галасавання ў горадзе і раёне дасягнулі паўналецця 576 юнакоў і дзяўчат. Сярод іх навучэнец трэцяга курса Асіповіцкага дзяржаўнага каледжа Максім Александровіч, які і адказаў на пытанні карэспандэнта раёнкі.

— З працэдурай галасавання і асаблівасцямі гэтай электаральнай кампаніі знаёмы добра?

— Разабрацца было неабходна. Справа ў тым, што я раней ніколі не быў на выбарчых участках. А назіраць за электаральнымі працэсамі па тэлебачанні ці чытаць аб іх у СМІ — зусім не тое. Так што пагутарыў з бацькамі на гэтую тэму. А яшчэ ў каледжы актывісты райарганізацыі БРСМ правялі свайго роду вучобу маладых выбаршчыкаў: расказалі пра выбарчае права, пазнаёмілі з паўнамоцтвамі дэпутатаў, растлумачылі Закон краіны аб масавых мерапрыемставах, далі шэраг парад з асабістага вопыту. Так што засталося вызначыцца толькі з апошнім пытаннем: калі ісці на галасаванне. Схіляюся да таго, каб зрабіць гэта датэрмінова.

— Відавочна, за каго будзеце аддаваць свой голас, ужо вызначыліся. А па якіх крытэрыях ацэньвалі кандыдатаў у дэпутаты?

— Яны ўсе нашмат старэйшыя, паважаныя людзі, і параўноўваць іх, маючы невялікі жыццёвы вопыт, было няпроста. Але ж успрымаю гэтую частку выбараў як карысны практыкум удзелу ў грамадскай дзейнасці і пашырэнне кругагляду. Таму ўважліва вывучаў усю даступную інфармацыю пра кожнага кандыдата, што балатуюцца на ўчастку, дзе я зарэгістраваны. Крыніц для яе атрымання, лічу, дастаткова: лістоўкі, паведамленні ў друкаваных і электронных СМІ, сустрэчы з выбаршчыкамі… Шмат дало і знаёмства з праграмамі кандыдатаў у дэпутаты. Цяпер лепш разумею, якія праблемы рэгіёна сёння найбольш важныя, і таксама арыентуюся ў планах будучых народных выбраннікаў па іх вырашэнні.

Да таго ж, на мой погляд, мае значэнне і род дзейнасці кандыдата ў дэпутаты, бо ад гэтага таксама залежыць, ці кампетэнтны ён у справах, якія абяцае выканаць на выбарчай пасадзе.

— Наколькі важна для вас прыняць удзел у выбарах органаў заканадаўчай і прадстаўнічай улады?

— Вельмі адказны для мяне дзень, які абавязкова запомніцца. Зараз я ўпершыню скарыстаюся правам галасаваць, і гэта хвалюючы момант. Мы, моладзь, павінны быць адзінымі і падтрымліваць тое, чаго дасягнулі нашы продкі. За намі — будучыня краіны, якую мы будзем будаваць у міры і згодзе.

* * *

Традыцыйна грамадзянам, якія ўпершыню ў якасці выбаршчыкаў удзельнічаюць у электаральнай кампаніі, уручаюцца падарункі. Сёлета гэта памятнае выданне Канстытуцыі Рэспублікі Беларусь у цвёрдай вокладцы.