Учора аграрыі раёна прыступілі да ўборкі азімага ячменю

Па словах галоўнага агранома гаспадаркі Алесі Бондаравай, летась тут было засеяна азімым ячменем 30 гектараў, агульная ж плошча пасеваў гэтай культуры ў сельгаспрадпрыемстве — 50 га. Для вырошчвання былі выбраны гатункі “буслік Эліта” і “тэрэза” з павышанай зімаўстойлівасцю і ўстойлівасцю да хвароб. Разам з начальнікам дзяржрайінспекцыі па насенняводству, карантыну і ахове раслін Марынай Курыльчык з дапамогай спецыяльнага абсталявання праверылі спеласць культуры. Яна вылічваецца па адсотку вільготнасці на карні, які склаў аптымальную лічбу — 16%. Дапамагаюць сельгаспрадпрыемству збіраць ураджай аграрыі ААТ “ЖорнаўкаАГРА” Міхаіл Чарапок, Уладзіслаў Дражын і Мікіта Цалка.

Трэба адзначыць, што азімы ячмень калісьці ўжо вырошчвалі на Асіповіччыне, але гэта было невынікова. Раней глебава-кліматычныя ўмовы краіны з’яўляліся зонай, рызыкоўнай для гэтай культуры. Маласнежныя зімы і моцныя маразы часта прыводзілі практычна да поўнай гібелі пасеваў азімага ячменю, таму не было ўпэўненасці ў яго ўдалай перазімоўцы.

Але кліматычныя ўмовы ў краіне змяніліся: зімы сталі карацейшымі і цяплейшымі, лягчэй культурным раслінам пераносіць зімоўку. Мяняюцца і падыходы сельскай гаспадаркі да таго, што і калі больш выгадна вырошчваць. Улічваючы важнасць пытання і яго ўсёабдымны характар, які так ці інакш закранае кожнага жыхара краіны, на дадзеную тэму не аднойчы выказваўся Кіраўнік дзяржавы. Яшчэ летась на адной з нарад Прэзідэнт даў даручэнні па змяненні структуры пасеваў з акцэнтам на азімы ячмень. Зацікаўленнасць менавіта гэтай культурай абумоўлена шэрагам пераваг. Гэта самая скараспелая збожжавая культура, якая вырошчваецца ў краіне, з’яўляецца ідэальным папярэднікам для азімага рапсу: рана прыбіраецца і гэтым дазваляе своечасова і якасна правесці падрыхтоўку глебы і пасеў азімага рапсу, акрамя таго, ячмень незаменны для фуражнага кармлення ў жывёлагадоўлі.

Летась у раёне было засеяна 242 га азімага ячменю. Пад ураджай-2023 плануецца пашырыць пасевы гэтай культуры ў тры разы. Прагназаваць сёлетнюю ўраджайнасць пакуль што рана, аднак, абапіраючыся на агульнарэспубліканскі вопыт вырошчвання гэтай культуры, можна спадзявацца на высокія вынікі.