Плывуць камбайны па бязмежных прасторах хлебных ніў, у нізкім паклоне схіляюцца каласы, сустракаючы аграрыяў, сыплецца зерне ў бункер. На полі застаюцца радочкі саломы, якія рупліўцы хутка збіраюць у валкі. Узяліся адразу за некалькі збожжавых культур: малоцяць ячмень, жыта, пшаніцу, трыцікале. Нашы рупліўцы гатовы працаваць нават ноччу дзеля таго, каб у кожнага на стале быў хлеб. Хіба яны калі нас падводзілі? Вось і зараз на Асіповіччыне адзін за адным вызначаюцца хлебаробы-тысячнікі.

Старшыня райкама прафсаюза работнікаў АПК Святлана Сідоранка на мінулым тыдні наведала ААТ “ЖорнаўкаАГРА”. Разам з лідарам прафсаюзнай пярвічкі сельгаспрадпрыемства Лідзіяй Раманенка яна павіншавала вадзіцеля Аляксандра Пятрэнку з першай перавезенай тысячай тон зерня новага ўраджаю і ўручыла каштоўныя падарункі. Мужчына штогод у ліку лепшых на ўборцы. На раніцу 2 жніўня ён перавёз 1 003 тоны зерня. Агульны ж намалот гаспадаркі з 783 гектараў на сённяшнюю раніцу склаў амаль 3 300 тон. Радуе і сярэдняя ўраджайнасць —  42 ц/га. Азімага жыта намалочана 1 590 т, трыцікале — 323 т, ячменю — 150 т, пшаніцы —           1 228 т. Апошняя, дарэчы, урадзіла лепш за іншыя — 63 ц/га. Акрамя ўборкі зерневых каласавых, работнікі сельгаспрадпрыемства ўносяць мінеральныя ўдабрэнні пад ураджай наступнага года, праводзяць узворванне, назапашваюць сена.

Запаветную мяжу ў тысячу тон перайшлі і хлебаробы дзяржаўнага прадпрыемства “Вязаўніца-Агра”. Камбайнер Алег Аліноўскі і яго памочнік Ягор Галацэвіч на раніцу пятніцы намалацілі 1 061 т зерня і рапсу. Вадзіцель Раман Іўчык штогод лічыцца ў перадавіках гаспадаркі. Вось і сёлета не падвёў — перавёз больш за 1 140 тон збожжа. Выдатныя вынікі і ў вадзіцеля Івана Жуковіча: на раніцу 3 жніўня перавёз   1 059 тон зерня і рапсу. Кіраўніцтва гаспадаркі павіншавала рупліўцаў і ўручыла каштоўныя падарункі.

Уборка ўраджаю працягваецца. Надвор’е спрыяе адказнай працы. Як паведаміў намеснік старшыні райвыканкама — начальнік упраўлення па сельскай гаспадарцы і харчаванні райвыканкама Дзмітрый Міхалёў, на ўчарашнюю раніцу ў раёне было ўбрана 3 278 га, што складае 45% да плану. Намалочана амаль     11 тысяч тон збожжа пры сярэдняй ураджайнасці 33,5 ц/га. Калі разглядаць ураджай у разрэзе, то ячменю намалочана больш за тысячу тон, жыта — 6 114, пшаніцы — больш за 1 400, трыцікале — амаль 2 400 тон. Зерне рэалізуецца ў лік дзяржзаказу, працэнт яго выканання набліжаецца да 45. Да таго ж практычна завершана рэалізацыя масланасення рапсу па дзяржзаказе. Адначасова рыхтуецца глеба да восеньскай сяўбы пад ураджай-2023.