У аўторак на полі каля вёскі Каменічы прайшло ўзнагароджанне сёлетніх лепшых хлебаробаў дзяржаўнага прадпрыемства “Вязаўніца-Агра”

Апошнія жнівеньскія дні для добрага хлебароба заўсёды адзначаны поўнымі засекамі і, канечне, узнагародай за адданую працу. Работнікаў гаспадаркі прыехалі ўшаноўваць ганаровыя госці. Сярод іх старшыня Беларускага прафсаюза работнікаў хімічнай, горнай і нафтавай галін прамысловасці Святлана Клачок, старшыня Магілёўскага абласнога савета Белхімпрафсаюза Ігар Станкевіч, старшыня прафсаюзнага камітэта ААТ “Белшына” Ігар Вежнавец.

Дырэктар дзяржаўнага прадпрыемства “Вязаўніца-Агра” Леанід Гардзецкі і іншыя выказалі словы падзякі за цяжкую добрасумленную працу, якасную ўборку ўраджаю ў найкарацейшы тэрмін і годны ўклад у агульны каравай Беларусі.

Падзячнымі лістамі і грашовымі прэміямі ўзнагароджаны лідары працоўнага спаборніцтва: экіпажы Алега Аліноўскага і Ягора Галацэвіча, Яўгена і Мікалая Жукові-чаў, Паўла Грыцкевіча і Аляксандра Кірычэнкі, Юрыя Еўдакімовіча і Аляксандра Лапенчыка, Рыгора Грышановіча і Глеба Осіпава. Сярод вадзіцеляў у лідарах Іван Жуковіч, Раман Іўчык, Георгій Богук, Міхаіл Башкатаў і Анатоль Еўдакімовіч. За добрыя вынікі ў працы была ўзнагароджана і загадчык зернятока Людміла Громава.

Дарэчы, жніво набліжаецца да фіналу. Як даведаліся ў гаспадарцы, на ўчарашнюю раніцу было ўбрана 2 298 гектараў, а гэта 99% да плана. Агульны намалот з гэтай плошчы склаў больш за 7 800 тон зерня з сярэдняй ураджайнасцю 34,1 цэнтнера з гектара. Найбольш парадаваў сёлета азі-мы ячмень. Культура ўрадзіла 48,6 ц/га. Пры добрым надвор’і вынікі гарачай пары ў гаспадарцы падвядуць ужо на наступным тыдні. А потым трэба будзе сеяць рапс, падрыхтоўваць глебу, прасаваць і збіраць салому, ды і шмат іншай работы выконваць.