Турнір памяці ў Асіповіцкай спортшколе
У адну з вераснёўскіх субот у будынку дзіцяча-юнацкай спартыўнай школы сустрэліся адразу некалькі валейбольных каманд раёна. Прычына сур’ёзная: традыцыйны турнір па валейболу, прысвечаны памяці Івана Антонавіча Сазановіча, аднаго з заснавальнікаў валейбольнага клуба «Бадзёрасць».
Пачаліся спаборніцтвы з пастраення каманд. Перад прысутнымі выступіў бывалы ўдзельнік «Бадзёрасці» Чэслаў Ігнацьевіч Радзіеўскі. Падняць дзяржаўны сцяг запрасілі пераможцаў мінулых спаборніцтваў. Пасля афіцыйнай часткі валейбалісты стартавалі.
На працягу некалькіх гадзін спарт-смены нястомна выконвалі падачы і перадачы, забівалі адзін аднаму мячы, радаваліся поспехам і наракалі на няўдачы. Урэшце, пераможцы турніру вызначыліся. Сярод мужчын месцы размеркаваліся так: «золата» ў каманды ДРБУ-199, «срэбра» ў «Лакаматыва», а «бронза» — у спартклуба «Бадзёрасць». Першымі ў жанчын стала зборная шклозавода «Ялізава», другое месца заняла каманда «Бадзёрасць», а замкнулі тройку пераможцаў дзяўчыны — выхаванкі мясцовай ДЮСШ.
