Фінальнае “срэбра”
У пасёлку Вейна Магілёўскага раёна прайшоў фінал спаборніцтва “Скураны мяч” сярод падлеткаў 2001 года нараджэння і маладзей. Асіповіцкія футбалісты — вучні гімназіі і СШ № 1 — напачатку абыгралі ў сваёй групе каманды з Мсціслава і Горак, а ў фінале ва ўпартай барацьбе саступілі магіляўчанам — 0:1.
У выніку — ганаровае “срэбра”. Дарэчы, лепшым паўабаронцам прызнаны гімназіст Максім Азараў.
Фота Аляксандра ШЫЛЬЦА.

Нашы ў Партугаліі
Напрыканцы ліпеня выхаванец “Залатой перамогі” Максім Петкевіч будзе абараняць гонар нашай краіны на чэмпіянаце Еўропы па тайландскім боксе, які пройдзе ў Партугаліі, і на першынстве Еўропы па кікбоксінгу (К-1) у Польшчы. Поспехаў!

Спартыўнае лета
На базе ФАК ДЮСШ дзейнічаў спартыўна-аздараўленчы лагер, дзе займаліся актыўнай фізічнай падрыхтоўкай 20 выхаванцаў асіповіцкага клуба “Залатая перамога” пад кіраўніцтвам Сяргея Гідуляна.
Юнакі выконвалі падрыхтоўчую праграму для збораў нацыянальнай каманды па муай-тай, якія пройдуць у Мінску ў ліпені. Плануецца, што ў сталіцу адправяцца Максім Петкевіч, Раман Доўнар і Андрэй Чыгілейчык. Штодня рабяты актыўна займаліся фізічнай падрыхтоўкай, наведвалі трэнажорную залу, двойчы на дзень трэніраваліся на рынзе і гулялі ў спартыўныя гульні.

Спрыт і моц аграрыяў
Напрыканцы чэрвеня ў Кіраўску адбылася летняя спартакіяда сярод работнікаў аграпрамысловага комплексу Магілёўшчыны. У ёй прымалі ўдзел 27 каманд з сельскіх раёнаў, прадпрыемстваў, холдынгаў і аб’яднанняў АПК — усяго каля 800 чалавек.
Летняя спартакіяда стала працягам зімовай, якая адбылася ў Горках і дала старт гэтаму новаму пачынанню, якое ініцыіраваў камітэт па сельскай гаспадарцы і харчаванні Магілёўскага аблвыканкама пры падтрымцы губернатара вобласці Пятра Рудніка.
Асіповіцкая каманда складалася з 24 чалавек, якія прадстаўлялі амаль усе гаспадаркі раёна. І на працягу трох дзён іх чакала даволі насычаная спартыўная, конкурсная і забаўляльна-пазнавальная праграма.
Спаборнічалі аграрыі ў мнагаборстве “Здароўе”, лёгкаатлетычнай эстафеце, кіданні гранаты, стральбе з пнеўматычнай вінтоўкі, армрэстлінгу, шахматах, на паласе перашкод, стрытболе, міні-футболе і рыбнай лоўлі. Да таго ж у залік камандам уваходзілі балы, атрыманыя ў конкурсах на лепшую страву “Вясковы кацялок” і мастацкай самадзейнасці.
У выніку наша каманда заняла II месца па стральбе з пнеўматычнай вінтоўкі — выдатныя снайперскія навыкі прадэманстраваў спецыяліст упраўлення сельскай гаспадаркі Дзмітрый Вараб’ёў.
Дарэчы, паралельна ў Жылічах праходзіла спартакіяда сярод кіраўнікоў АПК. Тут вызначыўся намеснік старшыні райвыканкама, начальнік упраўлення сельскай гаспадаркі і харчавання Віктар Стурліс, які атрымаў другія месцы па стральбе з пнеўматычнага пісталета і ў дартсе.
Соф’я ПЛЫШЭЎСКАЯ.