З 15 па 16 чэрвеня Цэнтр творчасці дзяцей і
моладзі прымаў абласныя спаборніцтвы па мотамнагабор’і. Апошнія гады
мотакрасмены Магілёўшчыны сустракаліся на тэрыторыі Бялынічаў, а на гэты раз
прыехалі на Асіповіччыну.

— Трэба мяняць традыцыі, — патлумачыла намеснік
дырэктара абласнога Цэнтра тэхнічнай творчасці Вольга Рамашкевіч. — Тутэйшая
база цалкам задавальняе. Акрамя таго, нас тут цудоўна прынялі і арганізавалі
цікавую экскурсію ў музей. Вялікі дзякуй!

Усяго ў спаборніцтвах прынялі ўдзел шэсць каманд
з Магілёва, Бабруйска, Бялынічаў і Асіповічаў. Спартсмены спачатку адказвалі на
пытанні па правілах дарожнага руху, а потым дэманстравалі майстэрства фігурнага
ваджэння матацыкламі.

У выніку першае месца заняла каманда
Магілёўскага абласнога Цэнтра тэхнічнай творчасці, другое дасталося Бялыніцкаму
Цэнтру выхаваўчай работы, трэцяе — Асіповіцкаму Цэнтру творчасці дзяцей і
моладзі. Акрамя гэтага, наш Раман Шачак заняў другое месца па хуткасным
манеўраванні.