У прафесійна-тэхнічным каледжы прайшло
спартыўнае свята “Тата, мама, я — спартыўная сям’я”, арганізаванае аддзелам па
справах моладзі райвыканкама, райкамам БРСМ і ФСК “Алімпія”. У мерапрыемстве
прынялі ўдзел прадстаўнікі ЖКГ, малочнага камбіната, вайсковай часці 12180,
ЗЖБК і АУМГ.

Праграма свята ўключала ў сябе не толькі
спартыўныя конкурсы. Райцэнтр гігіены і эпідэміялогіі правёў віктарыну па
здароваму ладу жыцця, а яшчэ ўдзельнікі павінны былі праявіць свае артыстычныя
здольнасці, каб пантамімай паказаць пэўны від спорту.

Лепшыя вынікі паказала каманда ўпраўлення
магістральных газаправодаў, ІІ і ІІІ месцы занялі работнікі завода
жалезабетонных канструкцый і камунальнай гаспадаркі. Прызёры атрымалі ад ФСК
“Алімпія” грашовыя прызы і дыпломы, а аддзел па справах моладзі ўзнагародзіў
тортамі пераможцаў у асабістым заліку. Мацнейшым сярод татаў стаў Максім
Булавацкі (АУМГ), які за 2 хвіліны падняў пудовую гіру 73 разы. Іна Валовік
(малочны камбінат) была самай трапнай сярод жанчын, набраўшы ў дартсе 38 ачкоў.
А лепш за ўсіх сярод дзяцей скакаў на скакалцы Сямён Пятровіч (АУМГ).