У ДЮСШ адбыўся традыцыйны Кубак раёна па
валейболе памяці Івана Сазановіча, у якім прынялі ўдзел 5 жаночых і 7
мужчынскіх каманд. У якасці ганаровых гасцей на мерапрыемстве прысутнічалі
Генеральны дырэктар спартыўнага комплексу «Мінск-Арэна” Мікалай Ананьеў, даўнія
члены валейбольнага клуба «Бадзёрасць” Яўген Врублеўскі і Чэслаў Радзіеўскі.

Жаночыя спаборніцтвы завяршыліся перамогай
каманды шклозавода «Ялізава”, ІІ і ІIІ месцы занялі АЗАА і УМГ. Сярод мужчын
мацнейшымі сталі прадстаўнікі ДРБУ  №
199. Сярэбраныя медалі зноў заваявалі аўтаагрэгатчыкі, бронзавыя — лясгасаўцы.

Узнагароды мацнейшым прадставіў ФСК «Алімпія”, а
ДРБУ № 199 падрыхтавала падарункі лепшым ігракам: Алене Сасім (шклозавод) і
Аляксандру Дзераху (ДРБУ № 199). А адміністрацыя ДЮСШ у сваю чаргу ўручыла ў
знак падзякі за шматгадовую падтрымку персанальны прыз кіраўніку дарожнай
арганізацыі і па сумяшчальніцтву капітану каманды Уладзіміру Князевічу.