Ва ўзнагароду — падпіска

15 чысла ў ШШК «Дэбют” у турніры па хуткіх
шахматах, які не першы год арганізуе кіраўніцтва раённай газеты, у 9 турах
высвятлялі адносіны каля двух дзясяткаў чалавек самага рознага ўзросту.

Усе чатыры кандыдаты ў майстры спорту —
Аляксандр Крывашэеў, Віталь Кулакоў, Барыс Бліцко і Вячаслаў Козел — даказалі,
што маюць высокі ранг па праву. Разам з Дзмітрыем Кунцом, Уладзімірам Веташавым
і юным Iльёй Сідоранка менавіта яны і сталі ўладальнікамі ўзнагарод —
бясплатнай падпіскі-2012 на «Асіповіцкі край”. Віншуем!

У выніку — шостыя

Абласныя фінальныя спаборніцтвы «Белая тура-2011” прынеслі нашым
школьнікам (узрост — 14 гадоў і маладзей) 6 месца з 17 удзельнікаў. Яшчэ за два
туры да канца асіпаўчане ішлі трэцімі, але «падножку” на фінішы камандзе
падставілі моцныя сапернікі з Бабруйска і Магілёва, якім адпаведна саступілі з
лікам 1:4 і 2:3.

Гонар Асіповіччыны (у парадку дошак)
абаранялі  5-класнік САШ-4 Iлья
Сідоранка, які, дарэчы, выступіў проста выдатна, атрымаўшы перамогі ва ўсіх 8
партыях, Дзмітрый Голікаў (САШ-2), Кірыл Карачун (САШ-4), Насця Дзергалёва
(САШ-1) і Яўгенія Коўча (САШ-4).

Дарэчы, на базе шахматна-шашачнага клуба «Дэбют”
па-ранейшаму рэгулярна і бясплатна праводзяцца заняткі з будучымі Талямі ды
Алёхінымі, і трэнерскі штаб і сёння запрашае ўсіх жадаючых папоўніць рады
будучых маэстра. А асабліва — дзяўчынак ва ўзросце 6-12 гадоў. Задумацца
бацькам тут ёсць над чым: шахматы яшчэ нікому ў жыцці не перашкодзілі — толькі
наадварот!