ШАХМАТЫ. ХIII рэспубліканскі турнір сярод каманд прадпрыемстваў аўтамабільнага і сельскагаспадарчага машынабудаўніцтва, удзельнікаў якога нядаўна гасцінна, як і заўсёды, сустрэў прафкам завода аўтаагрэгатаў, па традыцыі прайшоў у ШШК “Дэбют”. На гэты раз за чэмпіёнскае званне змагалася 10 каманд, уключаючы дзве мясцовыя.

Двухдзённыя спаборніцтвы прынеслі перамогу гродзенскім спартсменам: “белкардаўцы” выйгралі ўсе матчы, набралі 22,5 ачка з 27 магчымых і за-служана прымалі галоўныя ўзнагароды-віншаванні. Другое месца занялі прадстаўнікі БелАЗа (20), а з “бронзай” рушылі дамоў аматары старажытнай гульні з Мінскага завода шасцярон (18,5).

Як выступілі “гаспадары поля”? Каманда “Асіповіцкі край” фінішавала шостай, АЗАА — дзявятай. Але без узнагарод асіпаўчане не засталіся: Аляксандр Крывашэеў, выступаючы на трэцяй дошцы, фінішаваў другім (7 ачкоў).

Таварыскія сустрэчы ў савецкія часіны па розных відах спорту праводзіліся даволі часта, цяпер жа падобнае амаль не назіраецца. Але кіраўніцтва Магілёўскай абласной грамадскай ветэранскай арганізацыі спартсменаў і работнікаў фізкультуры праявіла ініцыятыву і адрадзіла добрую справу: 25 красавіка ў “Дэбюце” 11 гасцей “кінулі пальчатку” мясцовым ветэранам-шахматыстам.

Паядынкі прайшлі напружана, і канчаткова ўсё вырашылася толькі “на флажку”. Першы тур-матч з лікам 6:5 выйгралі гаспадары, у другім усё змянілася, і агульны лік атрымаўся на карысць магіляўчан — 10,5:11,5.

Многія аматары гатовы за дошкай змагацца дзень і ноч, таму спантанна арганізавалі яшчэ і бліц-турнір. У 5-хвілінках высвятлялі адносіны 12 чалавек, і ў выніку магіляўчанін Аркадзь Паўлінковіч і нашы Вячаслаў Смольскі і Валерый Бардачоў падзялілі 1-3 месцы — усе набралі па 8,5 ачка.

Падводзячы вынікі сяброўскай сустрэчы і ўзнагароджваючы лепшых старшыня ўзгаданай ГА Мікалай Ланец шчыра падзякаваў асіпаўчанам за цёплы прыём і запрасіў цяпер ужо нашу каманду наведаць абласны цэнтр у адказ.

У рамках праграмы раённай спартакіяды сярод прадпрыемстваў і арганізацый  (I група) “золата” заваявала зборная “Лакаматыва”, “срэбра” — ААТ “АЗАА”, “бронзу” — УАЗ “Асіповіцкая ЦРБ”.

ШАШКI. 19 чысла ў ШШК “Дэбют” адбыўся адкрыты турнір, прысвечаны памяці мацнейшых шашыстаў раёна, якія ўжо пайшлі з жыцця — Аляксандра Александровіча, Мікалая Галузы, Сяргея Новікава і другіх. Лепшыя вынікі паказалі браты Аляксей і Анатоль Рыньякі і Мікалай Грыцаеў, а сярод ветэранаў першынстваваў Валерый Гацко.