Тысячны рубеж па перавозцы зерня перасягнуў вадзіцель ААТ «ЖорнаўкаАГРА» Аляксандр Пятрэнка, з чым і павіншавала яго ўчора старшыня райкама прафсаюза работнікаў аграпрамысловага комплексу Святлана Сідарэнка і ўручыла Падзячны ліст.

Малады працаўнік шчыруе ў гаспадарцы крыху больш за год. Жыццё ў райцэнтры і работа на заводзе аўтаагрэгатаў мела свае плюсы, але галоўнай праблемай стала адсутнасць жылля. А хлопец да таго часу ажаніўся, у сям’і нарадзілася двое дзетак. Таму вяртанне ў родную вёску, дзе разам з работай атрымаў дом, стала найлепшым варыянтам для сям’і.

І Аляксандр лічыць, што рашэнне прынята правільна. Дзецям таксама раздолле ў вёсцы: лес, чыстае паветра і колькі заўгодна месца для гульняў, ужо не кажучы пра экалагічна чыстыя ягады ды садавіну.

А да работы не прывыкаць: вырас у працавітай сям’і, з дзяцінства пазнаў «смак» заробленага рубля, бо гадоў з 14 летняй парой працаваў на зернетаку, нават адзначаўся старшынёй калгаса за стараннасць. За рулём Аляксандр таксама з малых гадоў: як любы сын шафёра, вадзіцельскую грамату пачаў асвойваць, бадай, раней, чым школьную праграму.

Каля 1.200 тон зерня перавёз Аляксандр. І гэта не мяжа, бо ёсць жаданне працаваць, сілы, добрая тэхніка і надзейны тыл.