З выразам “Восень — работ восем” можна паспрачацца: не менш іх і ў жніўні. Напрыклад, зараз у гаспадарках раёна ідзе прасаванне саломы і яе адвозка, падрыхтоўка палёў да сяўбы азімых, уборка асноўнай кармавой культуры — кукурузы ды іншае. Ну і, канечне, на сёння ўжо дакладна падведзены вынікі галоўнай работы ў гадавым сельскагаспадарчым цыкле — жніва. Пераможцам у раёне сёлета стаў экіпаж камбайна «Джон Дзір» ААТ “Авангард-Ніва” ў складзе старшага камбайнера Алега Малевіча і памочніка Руслана Iгрунова, які знаходзіцца ў сельгаспрадпрыемстве на практыцы — імі намалочана больш за тысячу тон збожжа. З мэтай павіншаваць лепшых хлебаробаў і накіраваліся ў гаспадарку на мінулым тыдні намеснік старшыні райвыканкама — начальнік упраўлення сельскай гаспадаркі і харчавання Дзяніс Захарчук і старшыня райкама прафсаюза работнікаў АПК Святлана Сідарэнка.

— Прыемна, што наш экіпаж прызнаны лідарам спаборніцтва, — дзеліцца Малевіч, — аднак быў бы яшчэ лепшы настрой, каб колас вырас больш важкім. У гэтым сезоне парадавала толькі яравая пшаніца — 51,8 цэнтнера на круг, але яе было ўсяго 40 гектараў, і трыцікале, кожны гектар якога ўрадзіў у сярэднім па 35,5 цэнтнера. Што тычыцца камбайна, то тэхніка не падводзіла, хоць «Джон Дзіру» ўжо 16 гадоў. Добра было арганізавана і харчаванне — забяспечваліся не толькі абедамі, але і вячэрай.

Безумоўна, спадзяёмся, што наступны год будзе больш ураджайным. Ну а пра адпачынак жа пакуль думаць рана — працы на полі хапае.