На зернетаках зараз усе сілы накіраваны на перапрацоўку збожжа: ачыстку, сушку, сарціроўку і іншае. У філіяле тры зярнетакі: у Каменічах, Ліпені і Вязаўніцы. У апошнім пагутарылі з загадчыкам склада і па сумяшчэнні загадчыкам тока Людмілай Громавай.

— Праца вельмі падабаецца, — расказвае Людміла Браніславаўна. — Падчас уборачнай цікава ведаць, колькі збожжа намалоцяць, колькі пакладуць у склады. Адчуваецца спартыўны дух, а яшчэ тое, што знаходзішся ў цэнтры важнай падзеі — хлебанарыхтоўкі. На раніцу серады наш ток перапрацаваў 5 577 тон зерня. Штосьці пойдзе на насенне, штосьці — на корм жывёле. Працуем кругласутачна. Зараз галоўнае — прасушыць зерне. Калі вадзіцелі прывозяць з палёў ураджай, мы не толькі ўзважваем яго, але яшчэ вымяраем узровень вільготнасці. Гэта найбольш важны паказчык якасці, бо ад яго залежыць захаванне зерня і працэс перапрацоўкі ў муку ці крупу. Таму і сушым да патрабуемых 18-14 працэнтаў. За дзень да нас паступае ад трохсот да пяцісот тон ураджаю, перапрацоўваем мы ў сярэднім 200 тон за суткі. Працуюць 24 чалавекі — гэта не пастаянны штат, бо ў такія напружаныя дні дапамагаюць работнікам зернятока дзесяць школьнікаў і пяць чалавек з Бабруйска. Прыязджаюць ужо не першы год, таму справу сваю ведаюць добра і працуюць сумленна.