Палявая рапсодыя

Сёлета азімы рапс выспеў пазней, бо халодны май прыпыніў рост расліны. Нядаўнія дажджы затрымалі ўборку. Так, учора раніцай убіралі культуру толькі філіял “Белшына-агра” ААТ “Белшына” і ААТ “ЖорнаўкаАГРА”. На той жа час з агульнай плошчы ў 1 050 гектараў было ўбрана 45.

Першым на поле “Аэрадром” ААТ «ЖорнаўкаАГРА» выйшаў Сяргей Піляк. Працуе ён у сельгаспрадпрыемстве каля 27 гадоў і ўжо дзясяты сезон яго пераводзяць спецыяльна на жніво з загадчыка майстэрняў у камбайнеры. Штогод Сяргей Аляксандравіч убірае ўсе віды культур і дапамагае другім: падрыхтоўвае тэхніку на мехдвары. Сёння яму дапамагае сын Дзяніс. Гэтым летам ён упершыню спрабуе татаў “хлеб” і плануе паступаць у тэхнікум, каб вывучыцца на механіка, як бацька.

Часу на збор ураджаю — не больш тыдня. Усяго ў гаспадарцы пад “Вітаўтам” — такім гатункам засяваўся надзел — 13 палёў агульнай плошчай 450 гектараў. Плануецца атрымаць прыкладна па 15 цэнтнераў з гектара. Дзяржзаказ — 400 тонн, каля 10-12 тон культуры рэалізуецца масланасеннем. Сеяў азімы рапс Аляксей Басякоў, а Аляксандр Вандышаў і Уладзімір Ласкавец змагаліся з пустазеллем і шкоднікамі. Застаецца спадзявацца, што расліне спадабалася месца і своечасовы догляд і яна аддзячыць за чалавечыя старанні.

Алена Суета.

e.sueta@gzt-akray.by

Фота Ніны ЦАРЫК.