Ураджай-2021

Кладзецца зерне ў засекі

Хлебаробы, што шчыруюць на палетках, час ад часу адрываюць позірк ад спелага калосся, што скрозь сцелецца перад вачамі, і паглядаюць на неба. Быццам бы і дажджы неабходны для асмяглых буракоў ды кукурузы, але ж яны зусім не патрэбны на зерневых нівах, убраць якія трэба хутка і якасна.

Першы намеснік начальніка ўпраўлення па сельскай гаспадарцы і харчаванні райвыканкама Дзмітрый Кулік расказвае, як у цэлым па раёне выглядае карціна ўборкі:

— Пакуль магу даць толькі аператыўныя звесткі. Убралі 603 гектары рапсу. Сярэдняя ўраджайнасць 22,3 цэнтнера з гектара. Усяго сабралі 1 348 тон гэтай алейнай культуры.

Зерневыя пасаджаны на плошчы ў 7 055 гектараў, ужо ўбралі 2 218, а гэта 31 працэнт да плана. Намалот склаў 6 838 тон. Ураджайнасць — 31 ц/га.

Чарговасць уборкі залежыць ад тэрміну саспявання. Напры-клад, паперш убіраюцца азімыя жыта, трыцікале. Яравыя культуры — крыху пазней.

Добрым намалотам радуюць аграрыі ААТ “ЖорнаўкаАГРА” і сельгаспрадпрыемства “Вязаўніца-Агра”. Сярэдняя ўраджайнасць у гэтых гаспадарках — 39,3 і 35,4 ц/га адпаведна.

Задзейнічана 30 камбайнаў, якімі кіруюць вопытныя экіпажы. Так што спадзяёмся на хуткае завяршэнне ўборкі і добрыя яе вынікі.