Нарыхтоўка

Ураджай збірай і на зіму прыпасай!

Ліпень — сярэдзіна лета, калі масава паспяваюць дзікарослыя ды дамашнія садавіна-агародніна, ягады. Лішкі сакавітых пладоў закупляе Глускае райста.

Як паведамілі ў таварыстве, іх агароднінасховішча мае даволі вялікія аб’ёмы, таму зможа ўмясціць усю вітамінную прадукцыю, што прапануюць: агуркі, кабачкі, парэчкі, бульбу, цыбулю… Для гэтага гаспадарам трэба звярнуцца ў любы магазін райста. Працуюць у розных кропках раёна і нарыхтоўшчыкі.

Але жыхары Асіповіччыны не асабліва дзеляцца ўласным ураджаем. Затое, як заўсёды, ахвотна збіраюць і здаюць дары лесу. Найбольш часта гэта чарніцы, якімі багатыя нашы лясы. Адзін толькі Генадзій Курачоў з Лапіч прыняў у насельніцтва чатыры тоны гэтых ягад. Цэны на іх вагаліся, у залежнасці ад тэрміну паспявання, ад 3 да 8 рублёў за кілаграм. Зараз прымаюць па 7 рублёў 10 капеек. Цяпер здаваць сталі менш, а бывала, што сям’ёй прыносілі і па 40-50 кг у дзень. Некаторыя, каб папоўніць сямейны бюджэт, прысвячалі гэтай справе ўвесь працоўны адпачынак.

Зараз на чарзе брусніцы, іх пачнуць прымаць праз два тыдні. А вось дурніцы землякі не спяшаюцца несці ў прыёмны пункт, што і зразумела: не так многа іх у наваколлі, ды і цана за кілаграм гэтых каштоўных ягад толькі 4 рублі.

Часцей за іншыя магазіны ягаднікі-гараджане здаюць свой набытак у гандлёвую кропку Осава. Відаць, спрыяе таму ўдалае размяшчэнне крамы: адразу пасля збору можна рэалізаваць “трафей” і вярнуцца дадому ўжо з грашыма.

Сезон нарыхтовак працягваецца. Нарыхтоўшчыкі чакаюць дажджоў, спадзеючыся, што яны паспрыяюць ураджаю грыбоў, бо пакуль не багатыя на іх бары ды гаі.