Ураджай-2021

Плывуць па ніве караваны

“Бітва за добры ўраджай пачалася на Беларусі ў кожным калгасе”, — піша асіповіцкая паэтэса Лёля Багдановіч у адным са сваіх вершаў. І тое праўда, бо зараз самы час убіраць зерневыя, што вырасцілі маці-зямля і нястомныя рукі хлебаробаў. Нават надвор’е, нібы зразумеўшы важнасць моманту, крыху падкруціла кола нябеснага каларыфера, даўшы магчымасць камбайнерам працаваць у больш зручных умовах.

6 экіпажаў рупліва шчыруюць на нівах ААТ “ЖорнаўкаАГРА”, збіраюць выспеўшае калоссе азімай пшаніцы. Ужо ўбралі 144 га. Сваёй чаргі чакаюць яшчэ 88 га тэрыторыі з дадзенай культурай. Наперадзе азімае жыта і трыцікале, якія ўжо таксама ўвайшлі ў стадыю спеласці.

Галоўны аграном гаспадаркі Алена Хвішчук, якая працуе ў СПК трэці год, задаволена сёлетнім жнівом. І ганарыцца ёсць чым: ураджайнасць пшаніцы складае 40-45 ц/га. Кажа, што ў яе практыцы гэты паказчык — самы высокі. Душа радуецца таму, што працуе калектыў нездарма. А да сваёй адвечнай справы работнікі палёў ставяцца адказна і сумленна. Як малады экіпаж у складзе Максіма Уласенкі і Данілы Міхадзюка, якія працуюць на ўборачнай першы сезон, так і вопытныя камбайнеры і іх памочнікі, як Кірыл Цяслёнак і Яўген Чаропка.