Гадзіннік адлічыў толькі сем гадзін раніцы, а працоўны тандэм машыніста Аляксандра Белякова і вадзіцеля Івана Жуковіча з дзяржаўнага прадпрыемства “Вязаўніца-Агра” ўжо шчыруе ў полі ля вёскі Хімное.

— Наша галоўная задача — сабраць усё гэтае зялёнае багацце, пакуль за-хоўваецца спрыяльнае надвор’е, — гаворыць Аляксандр Белякоў. — Трава сёлета добрая, сакавітая. Нашым рагулям зімой будзе чым паласавацца.

Агульны план першага ўкосу шматгадовых траў у раёне складае 7 896 гектараў. На 13 чэрвеня скошана ўжо 4 109 га, ці 52% ад запланаванага аб’ёму. Прыбрана 3 410 га траў першага ўкосу, ці 83% да скошанага. Нарыхтавана 216 тон сена і 11 099 тон сенажу.