Алена Суета.

e.sueta@gzt-akray.by

Хлебная ніва каля вёскі Бозак у сераду ненадоўга стала імправізаванай сцэнай для ўзнагароджання лепшых хлебаробаў сельгаспрадпрыемства. Работнікаў гаспадаркі прыехалі ўшаноўваць ганаровыя госці. У іх ліку — старшыня Магілёўскага абласнога Савета Белхім-прафсаюза Ігар Станкевіч, галоўны тэхнічны інспектар працы Магілёўскай абласной арганізацыі Беларускага прафсаюза работнікаў хімічнай, горнай і нафтавай галін прамысловасці Уладзімір Лук’янаў, старшыня прафсаюзнага камітэта ААТ “Белшына” Ігар Вежнавец, намеснікі дырэктара дзяржаўнага прадпрыемства “Вязаўніца-Агра” Валянцін Шкурын і Вольга Каўко ды іншыя. Яны выказалі словы падзякі за цяжкую добрасумленную працу і годны ўклад у агульны каравай Беларусі.

Вадзіцель сельгаспрадпрыемства Раман Іўчык першым дасягнуў заветнага рубяжа ў тысячу тон перавезенага зерня яшчэ на мінулым тыдні. Праз некалькі дзён да яго далучыліся калегі Георгій Богук і Максім Міхалевіч. Сярод камбайнераў лідзіруюць экіпажы Міхаіла Калячкі і Вадзіма Вікторчыка, Паўла Грыцкевіча і Міхаіла Стрыкунова, Аляксандра Курловіча і Анатоля Малахава, Алега Аліноўскага і Івана Жуковіча, Юрыя Еўдакімовіча і Аляксандра Лапенчыка, Канстанціна Сіліцкага і Паўла Белабародава, Мікалая Гіліцкага і Валерыя Еўдакімовіча. Мужчынам уручылі каштоўныя падарункі і грашовыя прэміі.

Дарэчы, жніво набліжаецца да фіналу. На раніцу серады было ўбрана 1 503 гектары, а гэта 71% да плана. Агульны намалот з гэтай плошчы склаў больш за 5,5 тысячы тон зерня з сярэдняй ураджайнасцю 37,1 цэнтнера з гектара. Ураджай на ўзроўні мінулага года, але сваёй чаргі чакаюць лепшыя палі, таму лічба напэўна павялічыцца. Найбольш парадавала сёлета жыта. Культура ўрадзіла — 38,6 ц/га. Пры добрым надвор’і вынікі гарачай пары ў гаспадарцы будуць падводзіць ужо на наступным тыдні. А потым трэба будзе сеяць рапс, падрыхтоўваць глебу, прасаваць і збіраць салому, ды і шмат іншай работы выконваць.