Каля пяці гадоў працуе аператарам машыннага даення на малочнатаварным комплексе ў вёсцы Свіслач Ніна Ладонька-Кісель, а агульны стаж яе работы ў сельскагаспадарчай галіне значна большы.

Дзяцінства Ніны прайшло ў вёсцы Курганы Кіраўскага раёна. Пасля школы скончыла бухгалтарскія курсы ў Бабруйску, але папрацаваць па спецыяльнасці дзяўчыне не ўдалося: стварыўшы сям’ю, пераехалі з мужам Валерыем у аграгарадок Бацэвічы Клічаўскага раёна. Там атрымалі дом ад калгаса і сталі працаваць у мясцовым сельгаспрадпрыемстве.

Работа на ферме фізічна даволі складаная, ды Ніна не прывыкла пасаваць перад цяжкасцямі. Працавала, вяла хатнюю гаспадарку, гадавала дзяцей — і з усім спраўлялася паспяхова. А вось хваробу мужа пераадолець было не ў яе сілах. І калі Валерыя не стала, жанчына пераехала з дзецьмі ў аграгарадок Свіслач. Работу знайшла хутка. Звярнулася на ферму: у гаспадарцы працоўныя рукі заўсёды па-трэбны, а яшчэ больш — вопыт і працавітасць. Паўторна выйшла замуж. І цяпер муж і жонка маюць адно месца работы на дваіх, толькі на работу ходзяць не разам, бо графік адрозніваецца: Ніна — аператар машыннага даення, Уладзімір — вартаўнік.

Яе дзень пачынаецца ў чатыры раніцы, а праз гадзіну жанчына ўжо пачынае дойку, якая працягваецца да васьмі. Вечарам чакае тая ж працэдура. Але аператар павінен не толькі даіць, а яшчэ і сачыць за станам жывёл, прыводзіць у належны выгляд адпаведнае абсталяванне, таму што чысціня і парадак — неад’емныя ўмовы атрымання якаснай прадукцыі. А кожная карова чакае цеплыні і ўвагі, бо пры дрэнным настроі можа і не аддаць малако. Таму ніякая аўтаматыка не заменіць вопытных спрытных рук, пяшчотнага голасу і пастаяннага клопату руплівай гаспадыні.

Ніна Мікалаеўна выгадавала траіх дзяцей: старэйшая дачка Вольга рэалізавала матчыну мару і стала эканамістам, жыве і працуе ў Маладзечна. У гэтым жа горадзе атрымлівае будаўнічую прафесію малодшы сын Арцём, а сярэдняя з дзяцей Дар’я вучыцца ў Беларускім дзяржаўным педуніверсітэце імя Максіма Танка. Словам, мацярынскія абавязкі Ніна Ладонька-Кісель выконвае гэтак жа добра, як і працоўныя.