Сёлета вясна не спрыяе аграрыям: што ні дзень, то сюрпрызы. Але час не чакае, і палявыя работы ў сельгаспрадпрыемстве працягваюцца ў набраным тэмпе, хоць і з вымушанымі перапынкамі. “Вязаўніца-Агра” першая ў раёне пачала сеяць яравыя, сюды раёнка і завітала, каб даведацца пра будні самага адказнага перыяду ў сезонных справах аграрыяў.

Па словах дырэктара гаспадаркі Леаніда Гардзецкага, засталося засеяць толькі кукурузу ды ячмень. Па даных на ўчарашнюю раніцу, зерневымі і зернебабовымі засеяна 223 гектары, што складае больш за 75% ад задання. У тым ліку 207 га — ячмень, 16 — зернебабовыя. Па-ранейшаму сеюць аднагадовыя травы. Адначасова вядзецца падкормка азімых культур і шматгадовых траў. Так, на ўчора  азімых зерневых было падкормлена амаль 740 га, рапсу — 215, сурэпіцы — 50, шматгадовых траў — больш за 40 га. Апошнія, дарэчы, былі падсеяны на 512 га. Вядзецца вывазка і ўнясенне арганікі — апошняй справе капрызы надвор’я зусім не перашкаджаюць.