Нечаканы подых зімы ў пачатку месяца, канечне, збіў запланаваны тэрмін сяўбы ранніх яравых культур у раёне, аднак з прыродай не паспрачаешся, таму аграрыі былі вымушаны зрабіць зусім непажаданы перапынак, пасля якога прыклалі шмат намаганняў, каб паспець засеяць палі.

Па словах галоўнага спецыяліста ўпраўлення па сельскай гаспадарцы і харчаванні райвыканкама Аляксандра Кавалёва, на ўчарашнюю раніцу ў раёне раннімі яравымі культурамі было засеяна каля 3 000 гектараў. Апошнія палі, адведзеныя пад гэтыя расліны, засяваюць ААТ “ЖорнаўкаАГРА” і “Авангард-Ніва”.

Працягваецца сеў шматгадовых траў, праводзяцца хімпраполка азімых зерневых культур і інсектыцыдная апрацоўка азімага рапсу. Там, дзе зіма “пабіла” апошнюю культуру, зараз сеюць яравы аналаг. Акрамя гэтага, гаспадаркі прыступілі да сяўбы кукурузы, а сялянска-фермерская гаспадарка “АграАўтаНова” — цукровых буракоў.

На палях ААТ “Авангард-Ніва” завяршаецца сяўба ячменю. Як адзначыў выканаўчы дырэктар гаспадаркі Віктар Юдзін, праз пару дзён работнікі скончаць другую падкормку азімых культур. Таксама завяршаецца сяўба люцэрны, адначасова механізатары прыводзяць у парадак тэхніку да корманарыхтоўкі.