Марозны люты даволі хутка ўступіў месца вясне. Сакавіцкае сонейка сагравае зямлю, і работнікі сельгаспрадпрыемстваў спяшаюцца правесці важныя палявыя работы, неабходныя для забеспячэння якаснага ўраджаю. На палях ААТ “ВязаўніцаАгра” зараз задзейнічана больш за дзесяць адзінак тэхнікі, якія выконваюць разнастайныя задачы: падкормку азімых, закрыццё вільгаці ў глебе, узворванне і ўнясенне ўгнаенняў і мінеральных удабрэнняў.

Недалёка ад вёскі Паташні шчыруе на сваім трактары механізатар сельгаспрадпрыемства Валерый Ганчаронак, падсяваючы канюшыну на зялёны корм для жывёлы. Галоўны аграном ААТ “ВязаўніцаАгра” Юрый Сычэвіч паведаміў, што сёлета плануецца засеяць каля 400 гектараў канюшынай і па 100 гектараў люцэрнай і злакавымі травамі. Таксама будзе праводзіцца перазалужэнне пашаў.

На гэтым жа тыдні чакаецца пачатак сяўбы яравых культур. Юрый Сычэвіч адзначыў: каля 300 гектараў будзе адведзена пад ячмень, 40 га — пшаніцу і каля 380 — зернебабовыя. З прыходам устойлівага цяпла работы на палях будуць набіраць яшчэ большую актыўнасць.