Шырокі прастор, пакуль не зусім лагодны малады вецер, высокае блакітнае неба і выразны пах свежаўзаранай зямлі. Такія ўражанні пакінуў першы сёлетні выезд у поле журналіста. А што адчуваюць механізатары на старце новага сезона? Аб гэтым запыталіся ў Віктара Саковіча з ААТ “ВязаўніцаАгра”. І гутарку вялі, зразумела, непасрэдна на свежым ворыве.

— Канечне, некаторае хваляванне ёсць, — расказвае Віктар Віктаравіч. — І тут больш не любаванне вясновым наваколлем, хаця і не без гэтага, а адчуванне вялікай адказнасці. Распачынаю сезон на новым энерганасычаным трактары “Беларус-3522” — магутным, але ў той жа час паслухмяным. Безумоўна, патэнцыял такой тэхнікі адчуваецца. Сеялка АПП-6Д упэўнена спраўляецца з задачай нават на плошчах з перападамі грунту. Першы засеяны клін каля 20 гектараў. Сам яго і рыхтаваў да сяўбы. Так што з мяне і запытанне за якасць. Сеем авёс. Поле агранамічная служба выбрала невыпадкова: тут ужо ралля дастаткова прагрэтая, гатова прыняць насенне, тэхніка не грузне. Пакуль што не на кожны ўчастак выйдзеш з сеялкай.

Віктар Саковіч у “ВязаўніцыАгра” працуе не так даўно, толькі год, аднак у сельскагаспадарчай справе далёка не навічок. І, дарэчы, яго гісторыя якраз добры прыклад таго, як пасведчанне трактарыста-машыніста, атрыманае яшчэ падчас вучобы ў школе, стала вызначальным фактарам у выбары прафесіі. Потым толькі прайшоў перападрыхтоўку ў Асіповіцкім дзяржаўным каледжы.
Работы наперадзе чакаецца шмат.

Сёлета толькі ранніх яравых у гаспадарцы трэба пасеяць каля 900 гектараў. 200 га — зернебабовых, 100 — аўса, 150 — ячменю, 440 — пшаніцы. На пасяўной плануецца задзейнічаць восем энерганасычаных трактараў: пяць “Беларус-3522” і тры “Беларус-3022”. З цягам часу будуць уключаны ўсе наяўныя рэсурсы, каб справіцца з работай якасна і ў аптымальныя агранамічныя тэрміны.

Валентина Корбаль