Гэта асаблівы дзень для ўсіх хлебаробаў раёна: на Асіповіччыну прыйшлі “Дажынкі”. Свята ўбірае ў сябе ранішнія росы і вечаровую прахалоду поля, размераны гул камбайнаў і водар спелай каласістай нівы. Ну і, канечне, радасць усіх працаўнікоў, хто меў дачыненне да агульнага каравая.

Выдатны настрой і ў маладых працаўнікоў філіяла “Белшына-агра” ААТ “Белшына” Сцяпана Давідовіча і Івана Жуковіча. Хлопцы паспяхова ўдзельнічалі ў маладзёжным спаборніцтве: першы — у якасці старшага камбайнера, другі — на перавозцы зерня. І сёння разам з іншымі хлебаробамі абодва будуць адзначаны за плённую працу. А яна ў іх і сапраўды была эфектыўнай: экіпаж Давідовіча намалаціў 837,8 тоны збожжа, Жуковіч даставіў на зерняток 1.216 тон дароў ніў.

Юнакі з кагорты тых, каму сельская праца па душы. “Пайшлі па слядах бацькоў!” — падкрэсліў у гутарцы Жуковіч. Ён вырас у Свіслачы, а Сцяпан — з Ліпеня. Згаджаюцца маладыя аграрыі з тым, што працаваць на роднай зямлі, на знаёмых з малых год палях асабліва прыемна. Таму, мабыць, і поспех не заставіў сябе чакаць?