У сельгаспрадпрыемствах раёна прайшоў чарговы дзень жывёлавода.

Мерапрыемства, якое праводзіцца штомесяц, не губляе сваёй актуальнасці, бо ў гэтай галіне клопатаў заўсёды хапае, і пытанняў, якія хвалююць мясцовых працаўнікоў, нямала. Згодна з устаноўленым графікам, фермы ў дзень жывёлавода наведалі прадстаўнікі ўлады, кіраўніцтва і спецыялісты райсельгасхарчу. Напрыклад, намеснік старшыні райвыканкама Ганна Землянухіна і галоўны спецыяліст аддзела эканомікі ўпраўлення па сельскай гаспадарцы і харчаванні Кацярына Якушава адправіліся ў ААТ “Асіповічыаграпрамтэхзабеспячэнне”.

Сустрэча адбылася на малочнатаварным комплексе “Забалацце”.

Асноўнае пытанне, якое найбольш хвалявала работнікаў, тычылася заробку. Яно і вядома: надоі тут, на жаль, невялікія.

Ганна Уладзіміраўна падрабязна растлумачыла парадак налічэння адраснай дапамогі. Расказала пра запланаваны рамонт даху мясцовай школы, іншыя мерапрыемствы і добраўпарадкаванне раёна, развіццё інфраструктуры. Падчас размовы жывёлаводы мелі магчымасць задаць свае пытанні і атрымаць на іх адказы.

На комплексе працуе 11 чалавек. Адметна, што амаль усе работнікі дзесяць гадоў таму перайшлі сюды з ААТ “Пратасевічы” і засталіся менавіта ў гэтай гаспадарцы. Трошкі пазней яны атрымалі жыллё ў аграгарадку. Пэўны час сельгаспрадпрыемства знаходзіцца ў няпрос-тым фінансавым становішчы, аднак жаданне працаваць у жывёлаводаў ёсць, і гэта галоўнае.

Сёння на ферме ўтрымліваецца 415 галоў буйной рагатай жывёлы, з іх 166 кароў складаюць дойны статак. Ёсць цялушкі, якіх перадала кіруючая арганізацыя ААТ “ЖорнаўкаАгра”. Менавіта яны з часам і дададуць малака, якога так не хапае гаспадарцы. Вялікую надзею калектыў таксама ўскладае і на новую форму ўпраўлення і кіраўніка гаспадаркі Віктара Стурліса.