Гужам плывуць машыны, гружаныя ёмістымі буракамі, на Асіповіцкі буракапрыёмны пункт Слуцкага цукроварафінаднага камбіната. Салодкія караняплоды трэба паспяваць своечасова разгружаць, буртаваць, а затым грузіць у вагоны і адпраўляць на далейшую перапрацоўку.

Пра нарыхтоўку цукровых буракоў расказаў начальнік пункта Міхаіл Беразоўскі:

— Сюды сёння паступаюць караняплоды з Асіповіцкага, Бабруйскага і Кіраўскага раёнаў. Апошні, дарэчы, здаў найбольшую колькасць: амаль 44 тысячы тон па даных на канец мінулага тыдня. Менавіта ён 3 верасня і пачаў сезон нарыхтоўкі.

У другой палове верасня далучыўся наш раён, які ўжо здаў каля 10 тысяч тон. Першай з асіповіцкіх аграрыяў караняплоды стала прывозіць фермерская гаспадарка “АграАўтаНова”, і, зразумела, зараз яна ў лідарах сярод землякоў; затым ідуць ААТ “Авангард-Ніва” і дзяржаўнае прадпрыемства “Вязаўніца-Агра”. За два месяцы бурака-прыёмны пункт прыняў больш за 70 тысяч тон караняплодаў з утрыманнем цукру 16,8-17%.

На прадпрыемстве задзейнічана магутная тэхніка, у тым ліку тры пагрузчыкі і столькі ж буртаўкладачных машын. Да 11 пастаянных рабочых нанялі яшчэ чатырох сезонных, і работы хапае ўсім.

Дзмітрый Гацман, Пётр Барысік, Міхаіл Беразоўскі, Андрэй Шабека, Генадзь Новік, Сяргей Мадаў прымаюць цукровыя караняплоды.