Сяўба ў аптымальныя агратэхнічныя тэрміны — надзейны падмурак добрага ўраджаю. А ўкласціся ў іх можна толькі пры поўнай гатоўнасці шлейфу сельгастэхнікі для веснавых палявых работ

Пакуль вясна не вельмі спяшаецца ўступіць у свае правы, але веснавая пасяўная кампанія можа пачацца раптоўна. Пра гатоўнасць да веснавых палявых работ у падначаленай гаспадарцы па стане на 15 сакавіка расказаў кіраўнік КСУП “Ясеньскае” Валянцін Шкурын:

— Прывесці ў належны стан машынны парк — задача не з лёгкіх: тэхнікі многа, яна разнастайная па стане і тэрміну эксплуатацыі, таму аб’ём праведзеных работ быў значны. Зімой адрамантавалі плугі, зубавую барану, пасяўны агрэгат, сеялку пнеўматычную ўніверсальную шасціметровую і сеялку дакладнага высеву васьмірадовую. “БНБК-АГРА Асіповічы” набыла для сельгаспрадпрыемства новы трактар МТЗ-82.1.

Задачы на вясну пастаўлены немалыя. Сёлета плануецца засеяць 1 060 гектараў. З іх 100 гектараў зойме ячмень, 20 — яравое трыцікале, 10 — гарох, 100 — адналетнія травы, 630 — кукуруза, з якіх 50 на зерне. Да таго ж трэба падсеяць 200 га люцэрнай.

Акрамя таго, чакаюць падкормкі мінеральнымі ўдабрэннямі 765 га азімых культур, 533 — шматлетніх траў, 500 — сенакосаў і пашы. Падчас веснавых работ задзейнічана 12 механізатараў і больш за 25 адзінак тэхнікі, сярод якой чатыры энерганасычаныя трактары, па тры МТЗ-1221 і МТЗ-82, 12 сельгасмашын, пасяўныя агрэгаты, плугі, дыскатары, культыватары, сеялкі, камбініраваныя глебаапрацоўчыя агрэгаты, машыны для ўнясення ўдабрэнняў і ўгнаення і гэтак далей.

Дапамагае створаная ААТ “БНБК-Агра Асіповічы” машынна-трактарная станцыя, з якой нашай гаспадарцы былі выдзелены два трактары МТЗ-1221 і РУ-7000 для ўнясення цвёрдых мінеральных удабрэнняў і пагрузчык для вывазкі арганікі.