Хлеб — справа сямейная

Дружна працуе каманда хлебаробаў у ААТ “ЖорнаўкаАГРА”. Можна сказаць, па-сямейнаму. Мяркуйце самі: на камбайнах “Палессе” КЗС-12 — экіпаж у складзе Сяргея Піляка і яго дачкі Надзеі; другі ўзначальвае сын Сяргея Аляксей Піляк з напарнікам Іванам Жуком; за штурвалам наступнага “карабля ніў” упершыню працоўны дуэт Дзмітрыя і  Сяргея Міхайлавых. Побач з роднымі работа ідзе ахвотней, ды і сям’я, як ні круці, агульнай справай умацоўваецца.

— Ганаруся, што змог прывіць цікавасць да сельскай працы і тэхнікі сваім дзецям, — дзеліцца Сяргей Піляк. — І хоць Надзя дзяўчынка, аднак ёй вельмі хацелася паспрабаваць камбайнерскі хлеб, і хватку ў яе бачу. Мяркую, што не гэта будзе яе асноўным заняткам: ёсць больш жаночыя прафесіі, аднак такая практыка пэўна не пашкодзіць.

На адвозцы ў гаспадарцы адзначаюць руплівасць вадзіцеляў Сяргея Корнева і Мікалая Кайко.

Увогуле работы жорнаўскім аграрыям прадстаіць нямала: да ўборкі ў пачатку сезона належала 1 800 гектараў збожжа і зернебабовых. Распачалі з ячменю, якога тут было 700 гектараў. На сёння гэта культура ўжо ўбрана.

І калі год не зусім ячменны — відавочна, зімою месцамі расліну “прыхапіла” і яе ўраджайнасць не перасягнула 25 цэнтнераў з гектара, — то адназначна больш важкі колас выспявае ў пшаніцы, чые плошчы наступныя ў графіку жніва.