У адным з шасці цэхаў вытворчага ўчастка ААТ “Бабруйскі камбінат хлебапрадуктаў” выпускаюцца аўсяныя крупы

Размешчаны крупацэх на пяці паверхах, дзе працуе 16 чалавек, якія добра ведаюць сваю справу. Сярод іх аператары па перапрацоўцы зерня, выбайшчыкі, лабаранты і майстры. Кожны адказвае за канкрэтны ўчастак работы, а ўсе разам на працягу месяца выпускаюць прыкладна 840 тон гатовага прадукту.

— Тэхналагічны працэс добра наладжаны і адпавядае сучасным патрабаванням, — гаворыць Таццяна Ткачова. — Спачатку ідзе ачыстка аўса ад смецця на сепаратары і дробнага зерня на элеватары. Адабраная сыравіна па транспарцёрнай стужцы паступае ў крупацэх. На лініі апрацоўкі аўса адбываецца пазбаўленне зерня ад плёнак і варсінак пасродкам лушчэння, крупа прапускаецца праз сепаратар, дзе ачышчаецца ад прымесяў і дробных фракцый, і фотасепаратар, дзе адбываецца аддзяленне прымесяў, якія адрозніваюцца па колеры, выбай гатовай прадукцыі, яе ўпакоўка і маркіроўка. Кожныя дзве гадзіны вырабляемы прадукт правяраецца лабарантамі на якасць. За функцыянаваннем машын уважліва сочаць аператары і прадухіляюць збоі ў рабоце. З даведзеным планам спраўляемся своечасова. Дарэчы, такі від круп, а іменна недраблёных першага гатунку, зараз вырабляецца ў нашай краіне толькі ў Асіповічах. Большая частка накіроўваецца ва Украіну, у заказчыках таксама і Сербія. У невялікіх аб’ёмах крупу купляе і адно з беларускіх прадпрыемстваў.

Ніна ВІКТОРЧЫК.

n.viktorchik@gzt-akray.by