Жывёлагадоўля

Рухацца ў зададзеным кірунку

Мінулы год для асіповіцкіх сельгасвытворцаў адзначыўся станоўчым вынікам па ўсіх пазіцыях. Але некаторыя праблемы па-ранейшаму не выпраўлены

У якім кірунку трэба дзейнічаць спецыялістам жывёлагадоўлі сёлета, даведаліся ў намесніка начальніка ўпраўлення сельскай гаспадаркі і харчавання райвыканкама Алены Кадуш.

— Выканаць распрацаванае заданне па вытворчасці і асемяненні матачнага пагалоўя магчыма, але неабходна забяспечыць жорсткую выканаўчую тэхналагічную дысцыпліну. Асноўная роля кіраўніка гаспадаркі — стварыць спрыяльныя ўмовы для вытворчасці і тады ўжо патрабаваць ад работнікаў пэўных вынікаў.

У гаспадарках раёна рэгулярна праводзяцца супрацьэпідэмічныя работы, навучанне новым тэхналогіям даення і іншаму. Аднак застаецца актуальнай праблема са спецыялістамі. Справа ў тым, што з навучальных устаноў часам прыходзяць ветурачы, якія губляюцца пры выглядзе каровы, баяцца падысці да яе, не гаворачы ўжо пра тое, каб зрабіць укол ці іншую маніпуляцыю. У іх амаль што няма практыкі зааветслужбы. Як вынік — жывёле не аказваецца своечасовае лячэнне. Канечне, гутарка не аб усіх. Прыкладам адказнага ветурача, які ўжо здолеў сябе зарэкамендаваць з добрага боку, з’яўляецца Наталля Цалко з ААТ “ЖорнаўкаАГРА”. Яна вельмі граматна арганізавала работу, пільна сочыць за новымі тэхналогіямі і прымяняе іх на практыцы. Аднак гэта адзінкі. Таму гаспадаркі вымушаны вяртацца да старых кадраў. Так, у ААТ “Авангард-Ніва” працуе ветурач-пенсіянер Людміла Кузьміных, а ў ААТ “Бярэзіна-Агра-Люкс” — заатэхнік Таццяна Калацілка. Трэба адзначыць, што работа ў жывёлаводаў вельмі цяжкая і  ненарміраваная, але яны не адмаўляюцца ад яе, нягледзячы на тое, што ўжо выйшлі на заслужаны адпачынак. Ведаюць, наколькі важная і неабходная гэта праца, прымаюць адказнасць за кожную жывёлу, дзеляцца сваімі вопытам і ўменнямі. Хочацца, каб у раёне было як мага болей такіх самаадданых спецыялістаў.

Што тычыцца зімовага ўтрымання БРЖ, дык тут вялікіх парушэнняў не было. Маніторым усе фермы па 2-3 разы ў тыдзень. Канечне, падчас моцных маразоў на фермах узнікалі невялікія праблемы, але работнікі адразу іх ліквідавалі. Увогуле, калектывы сельгаспрадпрыемстваў праявілі сваю згуртаванасць у складаны перыяд, што таксама з’яўляецца добрым паказчыкам.

Дарэчы, летась пераведзены ў сучасныя фермы кароўкі МТК “Жорнаўка” і МТФ № 8 філіяла “Белшына-агра” ААТ “Белшына”. ААТ “ЖорнаўкаАГРА” вядзе будаўніцтва памяшканняў для ўтрымання маладняку. Работы намечана шмат, і гарантаваць поспех могуць толькі беражлівыя адносіны да жывёлы.