Сельская гаспадарка

Зімовы перыяд на засеяных палях

Кантроль за раслінамі падчас зімоўкі — справа адказная. Ведаючы правільную ацэнку стану азімых культур і дакладную характарыстыку жыццяздольнасці пасеваў, можна скарэкціраваць комплекс агратэхнічных мерапрыемстваў вясной. Летась сельгаспрадпрыемствамі раёна было засеяна 7 623 гектары азімых зерневых культур. Як перазімаваў будучы ўраджай, расказала вядучы аграном — дзяржінспектар раённай  інспекцыі па насенняводстве, каранціне і абароне раслін Настасся Цераш:

— Тэмпература паветра, снежнае покрыва і яго стан, а таксама тэмпература і глыбіня прамярзання глебы — асноўныя метэаралагічныя фактары, ад якіх залежыць перазімоўка азімых культур.

У канцы снежня ў раёне на палях з—за чаргавання слаба адмоўнай тэмпературы паветра ўначы і адліжнай днём, а таксама дажджоў з’явілася невялікая прыцёртая ледзяная корка таўшчынёй 1 см. Студзень характарызаваўся кантрасным надвор’ем пры рэзкім пахаладанні ў сярэдзіне месяца і лішкам ападкаў. Снежны полаг, які ўсталяваўся, абараняў расліны ў моцныя маразы. На працягу месяца тэмпература глебы на глыбіні залягання вузла кушчэння азімых зерневых культур і каранёвай шыйкі шматгадовых траў утрымлівалася каля нулявой адзнакі, што значна вышэй аптымальных для перазімоўкі значэнняў.

Павышаныя тэмпературы глебы пад снежным покрывам і слабым прамярзанні актывіруюць у раслін працэсы дыхання, якія суправаджаюцца расходам назапашаных спажыўных рэчываў. Працяглае захоўванне такога аграметэаралагічнага становішча можа прывесці да спусташэння азімых культур. Аслабленыя пасля зімоўкі расліны больш схільныя да захворванняў, а таксама меней устойлівыя да неспрыяльных фактараў асяроддзя (напрыклад, вяртанне халадоў або недахоп снегу).

Пасевы азімых зерневых культур увайшлі ў зіму ў стадыі 2-3 ліста — кушчэння. Азімыя рапс і сурэпіца спынілі вегетацыю ў стадыі ўтварэння ліставой разеткі.

Даць папярэднюю ацэнку стану пасеваў у перыяд перазімоўкі дазваляе маналітны метад. Так, маналіты адбіраліся ва ўсіх сельгаспрад—прыемствах раёна. Усяго абследавана 1 722 га азімых зерневых, 422 га рапсу і 35 га сурэпіцы. Адрошчванне маналітаў, праведзенае ў трэцяй дэкадзе студзеня—пачатку лютага, паказала, што ўзгаданыя расліны ў асноўным жыццяздольныя. Назіралася поўнае адрастанне культур у маналітах.

Гібель азімых раслін не адзначана. Паражэнне снежнай цвіллю зерневых у раёне выяўлена на 47% абследаваных плошчаў, сопкай расой — на 35%. Максімальны працэнт пашкоджаных раслін сустракаецца на пасевах азімай пшаніцы ранніх тэрмінаў сяўбы ў ААТ “Авангард—Ніва” і “ЖорнаўкаАГРА”. Сярэднеўзважаны працэнт пашкоджання азімага трыцікале ва ўсіх гаспадарках раёна — 20. Захворванне праяўляецца ў выглядзе адзінкавых плям.

Паражэнне раслін азімай сурэпіцы снежнай цвіллю пры абследаванні ў маналітах адзначана на 35 га. Сярэднеўзважаны працэнт пашкоджаннай культуры — 15. Далейшае развіццё хвароб і стан пасеваў пакажа другі тур маналітаў.