Лепшыя тэхнікі-асемянатары раёна вызначаны

У кожным сельгаспрадпрыемстве спецыяліст па штучным асемяненні буйной рагатай жывёлы  — адна з ключавых фігур у развіцці як жывёлагадоўлі, так і гаспадаркі ў цэлым. Ад яго залежыць узнаўленне статка, узровень надояў малака і сутачнага прыбаўлення ў вазе. Кожны год, нягледзячы на штодзённую практыку, спецыялісты пацвярджаюць сваю кваліфікацыю.

У Жорнаўскі сельскі Дом культуры памерацца не сілай, а ведамі з’ехаліся спецыялісты важнага ў жывёлагадоўлі звяна: тут праходзіў конкурс прафесійнага майстэрства па штучным асемяненні буйной рагатай жывёлы. За перамогу змагаліся 13 удзельнікаў. Мерапрыемства нагадвала экзамен, які ацэньвала журы. У яго склад увайшлі намеснік генеральнага дырэктара, начальнік аддзела па ўзнаўленні статка і вядучы заатэхнік-селекцыянер РУСВП “Магілёўскае дзяржплемпрадпрыемства” Максім Шынкевіч, Алена Маслак і Ганна Савіна адпаведна. Спаборніцтва праходзіла ў некалькі этапаў: пісьмовы тэст, праверка вядзення вытворчых журналаў, веданне правільнай падрыхтоўкі рабочага месца, тэхналогіі асемянення, шмат іншага.

Падчас сустрэчы спецыялісты дзяліліся меркаваннямі аб справах у сельгаспрадпрыемствах. Праблем у раёне па аднаўленні статка нямала. І эфектыўнасць залежыць не толькі ад работы асемянатара: на рэпрадукцыйныя якасці кароў уплываюць стан здароўя, умовы ўтрымання, рацыён. Так што добрых вынікаў на ферме можна дасягнуць толькі агульнымі намаганнямі.

У выніку пераможцамі сталі Тамара Будунова з ААТ “Асіповічыаграпрамтэхзабеспячэнне” — у яе першае месца, другое — у “белшынаўца” Віктара Мацвеенкі, на трэцяй пазіцыі Святлана Белаушка з ААТ “ЖорнаўкаАГРА”.

Кожнае сельгаспрадпрыемства падрыхтавала працаўнікам падарункі. Дырэктар мясцовага філіяла дзяржплемпрадпрыемства Наталля Губар павіншавала пераможцаў і ўручыла ім смачныя прызы ад філіяла “Асіповіцкі” ААТ “Бабушкина крынка”. Прэзенты з вырабамі малочнага камбіната атрымалі таксама Людміла Доўнар з ААТ “Авангард-Ніва” за добрасумленную працу і Станіслаў Прыгоцкі з філіяла “Белшына-агра” ААТ “Белшына” як малады спецыяліст.