Дойны статак КСУП “Ясеньскае” налічвае 820 кароў
Дойны статак КСУП “Ясеньскае” налічвае 820 кароў
Усяго ж на двух малочнатаварных комплексах гаспадаркі гадуецца 2 014 галоў буйной рагатай жывёлы. Прыемна адзначыць, што справы тут значна палепшыліся.
Па словах галоўнага заатэхніка Галіны Лебедзевай, з пачатку года ў параўнанні з аналагічным мінулагоднім перыядам надоі павялічыліся больш чым на 50%. Адна карова дае 267 кг малака, што складае амаль 200% да 2022 года. Сярэднясутачная прывага за той жа час вырасла больш чым у 2,5 раза.
— Станоўчая дынаміка абумоўлена ў першую чаргу наяўнасцю якасных канцэнтраваных кармоў, якімі забяспечвае ЗАТ “БНБК”, — гаворыць Галіна Алегаўна. — Жывёла сытая, паказчыкі растуць. За апошнія месяцы пашы трошкі высахлі, але сёлета пасадзілі шмат адналетніх траў, якімі зараз дакормліваем гадаванцаў.
Не так даўно працуе цялятнікам у МТК “Заельнік” Сяргей Рапалаў. Пад яго наглядам 81 “малое” ва ўзросце да 51 дня. Цяля, як дзіця, патрабуе асаблівага догляду, цярпення і ласкі. Кожны са сваім характарам: хтосьці нясмелы і трымаецца ў старонцы, а іншы, наадварот, хоча павышанай увагі. Усе яны атрымліваюць неабходны догляд.
Са сваёй справай Сяргей добра знаёмы: з дзяцінства дапамагаў бацькам на ферме. А на тое, што работа цяжкая і вельмі адказная, бо ад яе залежыць будучае пагалоўе, адказвае проста: “Вельмі важныя цярпенне і ўвага, а працы мы не баімся”.
Для таго каб утрымліваць статак у добрым стане, неабходна назапашваць кармы, аб’ёмы якіх на столькі галоў патрабуюцца нямалыя. На лугах гаспадаркі ва ўсю шчыруюць сельгасработнікі, задзейнічана шмат тэхнікі.
На полі “Журавец” касіць шматгадовыя травы дапамагаюць калегі з ААТ “Авангард-Ніва”, куды і адвозяць частку ўкосу. З ясеньскіх жа на лузе працуюць два кормаўборачныя камбайны, пяць трактароў і столькі ж МАЗаў. З апошніх тры адвозяць траву на комплексы на падкормку жывёлы, два — на нарыхтоўку сенажу.
Нягледзячы на незвычайна засушлівыя май і чэрвень, сельгаскультуры ў КСУП “Ясеньскае” растуць добра. Тут як нельга дарэчы адбілася спецыфіка ландшафту. Палі гаспадаркі размешчаны вельмі нізка і вясной заўсёды затоплены. З гэтай нагоды сяўбу пачынаюць пазней за іншых. Вось і сёлета насенне лягло ў занадта вільготную глебу, што і дапамагло супрацьстаяць капрызам прыроды.
Побач з “Жураўцом” знаходзіцца поле з кукурузай. Расліна хутка пераваліць за чалавечы рост. Моцная зялёная сцяна распасціраецца далёка да лесу. Па словах аграномаў Сяргея Новікава і Наталлі Пячонкі, такой культура вырасла на ўсіх палях гаспадаркі. Дарэчы, Наталля Сяргееўна працуе аграномам у сельгаспрадпрыемстве толькі тры месяцы. Малады спецыяліст прыехала на Асіповіччыну з Кіраўскага раёна па размеркаванні пасля заканчэння Жыліцкага дзяржаўнага сельскагаспадарчага каледжа. А Сяргей Васільевіч знаёміць дзяўчыну з палямі сельгаспрадпрыемства і работай аграрыяў на мясцовасці.
43 гады працуе ў гаспадарцы Мікалай Селівёрстаў. Будучы на заслужаным адпачынку, камбайнер ахвотна дапамагае аграрыям на сенажаці. Дарэчы, шчыруе ён на кормаўборачным камбайне, выдзеленым былым губернатарам Магілёўскай вобласці Леанідам Зайцам.
— Гады тры таму прыязджаў Леанід Канстанцінавіч у нашу гаспадарку, з работнікамі размаўляў, — успамінае Мікалай Мікалаевіч. — Ну і спытаў, чаго нам не хапае. А ў нас на дзве гаспадаркі ніводнага кормаўборачнага не было. Пра гэта яму і сказалі. А ён потым выдзеліў неабходную тэхніку, так на ёй і працую.
На ўчарашнюю раніцу ў гаспадарцы ўжо нарыхтавалі 324 т сена і 4 143 тоны сенажу пры плане назапасіць 650 тон і 6,6 тысячы тон адпаведна. У нядзелю аграрыі пачалі ўбіраць азімы ячмень. На ўчарашнюю раніцу ўжо намалацілі 28,78 тоны зерня.
“Зялёнае жніво” ў сельгас-прадпрыемстве нарасло вельмі добрае, толькі б тэхніка не падвяла. Кружаць буслы над полем, нібыта ахоўваюць аграрыяў — нездарма гэтыя даўганосыя птушкі з’яўляюцца сімваламі краіны.