Кліча на луг касавіца

Актыўна распачаўся сезон корманарыхтоўкі ў КСУП “Вязаўніца-Агра”

Скасіць 1 463 гектары шматгадовых траў — такая задача стаіць перад  працаўнікамі гэтага сельгаспрадпрыемства. А заданне па корманарыхтоўцы наступнае: назапасіць 2 092 тоны сена, 34 156 тон сенажу, 35 тысяч тон сіласу. Травастой на першы ўкос нядрэнны: з кожнага гектара зараз тут атрымліваюць каля 100 цэнтнераў зялёнай масы. Безумоўна, каб было больш ападкаў і больш высокая начная тэмпература, то травы раслі б яшчэ лепш: усе неабходныя агратэхнічныя патрабаванні для гэтага былі выкананы.

На касавіцы задзейнічана 17 адзінак тэхнікі, у тым ліку дзве касілкі. За УЭС-250 “Палессе” сеў трактарыст-машыніст Алег Аліноўскі. У справе нарыхтоўкі кармоў ён не навічок: за плячамі не адзін дзясятак гадоў работы на зямлі. Дарэчы, з усяго шэрагу сельскагаспадарчых работ працаўнік якраз вылучае “зялёнае жніво”. Гэта праца для яго найбольш прыемная сакавітай зелянінай за акном трактара, свежасцю, адсутнасцю пылу.

Выводзім тэхніку на сенажаць у сем гадзін раніцы, працуем да васьмі вечара, — расказвае механізатар. — Робім і ў выхадныя дні, бо дарагая кожная хвіліна. Убярэш у тэрмін — атрымаецца добры корм. Адчуваю асабістую адказнасць за справу, бо ад касілкі залежыць рытмічная работа ўсёй брыгады: за касілкай ідуць граблі, потым — падборшчык і трактар з прычэпам. Касілка — першае звяно, і яно павінна быць вызначальным.