На зернесушылцы захоўваецца не толькі ячмень, пшаніца, трыцікале і іншае збожжа, але і канюшына, кукуруза, гарох і нават камбікорм для буйной рагатай жывёлы. Работнікі сочаць за іх якасцю, галоўным паказчыкам якой з’яўляецца вільготнасць. Калі зерне дастаўляецца на месца захавання, яно прыводзіцца ў адпаведнасць са стандартамі. І хоць сёлета дажджоў было нямнога, але ўраджай даводзіцца добра дасушваць. Частка ўбранага была адпраўлена на Бабруйскі камбінат хлебапрадуктаў. Насенне, якое будзе захоўвацца да вясны, дадаткова ачышчаецца ад прымесяў. Немалаважна сачыць і за тым, каб вырашчанае не папсавалі грызуны ды насякомыя — супраць іх прымяняюць спецыяльныя сродкі.

— Уборка ўраджаю сёлета доўжылася з 24 ліпеня па 9 жніўня, — расказвае загадчык зернятока Наталля Сугака. — Але гэта не значыць, што дадзены аб’ект працаваў толькі гэты непрацяглы час: ён задзейнічаны ўвесь год. Тым не менш жніво — самая гарачая пара, у якую тут шчыравала дзевяць дарослых, а яшчэ ім дапамагалі тры школьнікі.

Дарэчы, калектыў брыгады аператараў зернесушыльнай устаноўкі даволі стабільны. Машыніст сушыльнага комплексу Мікалай Мацюшонак, аператар Яўгеній Гізбрэхт, слесар па ачыстцы зерня Уладзімір Ніціеўскі працуюць даўно, старанна, з усведамленнем значнасці справы забеспячэння землякоў хлебам.

— Цесна ўзаемадзейнічаў з імі і вадзіцель аўтамабіля ГАЗ-53 Аляксандр Цалко, які аператыўна дастаўляе ўраджай, прычым, у працэсе апрацоўкі можна лічыць, што перавозіць яго двойчы, — працягвае расказ Наталля Анатольеўна. — Вучням жа Лапіцкай школы Мікалаю Толкачу і Аляксею Гізбрэхту, а таксама Дзянісу Клунко з Жорнаўскай адзінаццацігодкі праца на зернесушылцы дазволіла не толькі атрымаць уласны заробак, але і далучыцца да пачэснай хлебаробскай справы. Словам, уся гэта дружная каманда змагла своечасова прасушыць і перапрацаваць увесь ураджай 2024 года.