Атрад ЮІР у дзеянні
Няма сумнення, што ведаць правілы дарожнага руху трэба з дзяцінства. Хто лепш засвоіў тэорыю і можа прымяніць яе на практыцы, высвятлялі атрады юных інспектараў 18 устаноў адукацыі. Для правядзення злёту традыцыйна расчыніла свае дзверы СШ № 3.
На жаль, нетыповае для красавіка надвор’е не дазволіла школьнікам выканаць іспыты на веласіпедах. Таму ў гэты раз хлопчыкі і дзяўчынкі ад 10 да 15 гадоў спаборнічалі ў трох намінацыях: “Агітацыйна-мастацкае прадстаўленне”, “Тэарытычны экзамен на веданне ПДР”, “Аказанне першай медыцынскай дапамогі”.
Каб вызначыць лепшыя каманды, працавалі члены кампетэнтнага журы, у склад якога ўваходзілі прадстаўнікі ДАІ РАУС, аддзела па адукацыі райвыканкама і раённага цэнтра творчасці дзяцей і моладзі.
Варта адзначыць, што ўсе ўдзельнікі злёту прадэманстравалі высокі ўзровень падрыхтоўкі, атрады згуртавана змагаліся за перамогу. Але мацнейшым на гэты раз стаў атрад ЮІР школы № 3. Лепшыя веды ПДР паказалі вучні СШ № 1, а больш эфектыўна аказвалі першую медыцынскую дапамогу рабяты СШ № 4.
Дарэчы, менавіта сення ў Бабруйску каманда вучняў СШ № 3 прадстаўляе наш раён на занальным этапе абласнога злёту-конкурсу атрадаў юных інспектараў дарожнага руху. Няхай іх удзел будзе паспяховым!
