Нарыхтоўшчыкі прымаюць чорныя і чырвоныя парэчкі, вішні, яблыкі, агуркі і кабачкі, але часцей за іншую прадукцыю насельніцтва нашага раёна здае чарніцы. Для многіх сямей гэта сродак зрабіць рамонт, набыць каштоўную пакупку або сабраць дзяцей у школу. Балазе, навакольныя лясы багатыя на гэтыя карысныя ягады. І таму кожнае лета жыхары Асіповіччыны на досвітку бяруць вёдры ў рукі і адпраўляюцца на промысел.

Куды ж можна здаць сабраны ўраджай? У Глускім райста адказалі, што чарніцы прымаюць усе магазіны спажывецкай кааперацыі. На пачатак тыдня гандлёвыя кропкі прынялі 5,1 тоны карыснай прадукцыі. Але не ва ўсе гандлёвыя аб’екты з аднолькавай ахвотай землякі здаюць ягады. Лідарам, як заўсёды, з’яўляецца крама ў вёсцы Осава, якая знаходзіцца на шляху паміж багатым на чарнічнік лесам і райцэнтрам, і “паляўнічым” на лясныя дары вельмі зручна рэалізоўваць “трафеі” адразу пасля іх збору. У гэтым магазіне прынялі 4,4 т чарніц.

На тэрыторыі Асіповіччыны працуе і шасцёра нарыхтоўшчыкаў ад Глускага райста. Усе разам яны прынялі ў насельніцтва 5,8 т чарніц. Самая плённая дзейнасць, мяркуючы па закупленым ураджаі, у Генадзя Курачова, які працуе на тэрыторыі Лапіцкага сельсавета і сабраў 3,2 т чарніц. Сярод асіпаўчан найбольш актыўная Таццяна Калешына — яна прыняла 1,3 т ягад.

У час паездак па раёне сустрэлі на лясных дарогах нарыхтоўшчыкаў з суседняга Кіраўскага райста, якія, праводзячы закупкі, завітваюць і на тэрыторыю Асіповіччыны. Яны растлумачылі, што збіраюць ягады на дзвюх кропках: у раёне Прудка і Літвінава.

Нямала нарыхтоўшчыкаў працуе і ад іншых арганізацый і прыватных прадпрыемстваў. Напры-клад, у Карытным сустрэлі Антаніну Гацман, якая зручна абсталявала прыёмны пункт пад кустом вінаграду каля адной з двухпавярховак. Да яе ручайкамі сцякаліся аднавяскоўцы з поўнымі вёдрамі ягад. Адна з іх, Ганна Афоніна, расказала, што на працягу двух тыдняў штодзённа здае ягады: ужо каля 140 літраў сабрала. Антаніна Паўлаўна не першы год закупляе чарніцы для ТАА “Полоцкая Ягода” і гэтым супрацоўніцтвам задаволена. У ліпені перадала ім на захоўванне і перапрацоўку больш за дзве тоны.

Некаторыя ж землякі рэалізуюць сабраныя чарніцы на трасе Мінск-Гомель, такіх каля магістралі на невялікай адлегласці ад горада налічылі з дзясятак. А яшчэ прадаюць на афіцыйных і стыхійных міні-базарчыках у райцэнтры.

Безумоўна, кожны прадавец хоча больш выгадна рэалізаваць свой тавар. А цэны на чарніцы адрозніваюцца, нават у межах аднаго райста. Пачыналі прымаць па 2 рублі за кілаграм, затым паступова павышалі закупачную цану, нават больш за 4 рублі плацілі, 27 ліпеня кошт кілаграма складаў 3,5 рубля, а 28 падскочыў да 4,3. Да слова, у адзін з дзён параўналі цану з суседнім раёнам, яна адрознівалася на 40 капеек, што даволі адчувальна для тых, хто хоча зарабіць. У спажыўтаварыстве растлумачылі, што цэны разлічваюць у залежнасці ад колькасці прапаноў, спеласці ягад і розных эканамічных паказчыкаў. Дарэчы, на трасе прапаноўваюць літровы слоік ягад (а гэта каля 800 грам) за 7 рублёў. Больш як   удвая даражэй, чым у спажывецкай кааперацыі. Відаць, гэта накрутка за тое, што чалавек дзень сядзіць каля шумнай магістралі ў чаканні пакупніка. І не заўсёды можа да канца рэалізаваць сабранае. А нарыхтоўшчыку можна здаць за лічаныя хвіліны і оптам — у любой колькасці.

Чарнічны сезон у разгары. Айда ў лес, забароны на наведванне зараз няма! А ягады, як сведчаць вопытныя зборшчыкі, у гэтым сезоне адменна сакавітыя. Але, думаецца, перш чым рэалізоўваць ураджай, лепей уволю наесціся карысных дароў прыроды. Варэнні, кампоты, сушаныя ягады таксама прыйдуцца да месца ў зімовы час. А потым, паклапаціўшыся пра сябе, і капейку зарабіць не пашкодзіць.