Сувязь наладжана
Кацярына ІВАНОВА.
e.ivanova@gzt-akray.by

Ветэранская пярвічка Асіповіцкага завода жалезабетонных канструкцый аб’ядноўвае 74 чалавекі.
Суполка адносна маладая — ад нараджэння толькі дзясятак гадоў, — але ў яе радах ёсць ветэраны самага рознага ўзросту. Радуе, што адзінокіх сярод іх няма. Кожны мае родных, якія пражываюць побач. Гэта пярвічка адрозніваецца ад іншых яшчэ і тым, што яе ветэраны не маюць вялікай патрэбы ў дапамозе: усе пражываюць у добраўпарадкаваных дамах з усімі выгодамі. Акрамя таго, на ЗЖБК, як і на чыгуначных прадпрыемствах, дзейнічае комплексная праграма “Клопат” па адраснай сацыяльнай падтрымцы непрацуючых пенсіянераў.
Былыя завадчане — частыя госці на прадпрыемстве, якому прысвяцілі многія гады жыцця. Тут ім адведзены асобны пакойчык, дзе можна сустрэцца, падзяліцца думкамі-перажываннямі, успамінамі. А старшыня савета ветэранаў Наталля Рудкоўская заўсёды гатова выслухаць. З цікавасцю адносіцца да жыцця ранейшых працаўнікоў і адміністрацыя прадпрыемства, запрашае на ўсе мерапрыемствы, якія праводзяцца з супрацоўнікамі. Наладжаны цесныя ўзаемаадносіны паміж ветэранамі і маладым пакаленнем, што зараз назіраецца нячаста. А гэта вельмі дзейсны сродак уздзеяння на калектыў. Калі ветэраны расказваюць пра былое, моладзь слухае і здзіўляецца. Хлопцам і дзяўчатам цяжка нават уявіць, як гэта: працаваць на энтузіязме, не патрабаваць грашовай кампенсацыі за пераработкі; і магічнай сілы слова “трэба” яны таксама не могуць асэнсаваць. Але, як кажуць, розныя часы — розныя прыярытэты.
На прадпрыемстве не забываюцца пра сваіх ветэранаў — і гэта галоўнае. Віншуюць са святамі, днямі нараджэння. Адметна, што наведвае савет ветэранаў сваіх пенсіянераў заўсёды разам з прадстаўнікамі БРСМ. Пры неабходнасці ім выдаюць матэрыяльную дапамогу. А ветэраны, у сваю чаргу, прымаюць удзел у суботніках, канцэртах. Адным словам, сувязь наладжана.