Дарогаю дабра

На мінулым тыдні прайшоў шэраг мерапрыемстваў, прысвечаных Дню інвалідаў Рэспублікі Беларусь

Алена Мартынчык.

e.martynchik@gzt-akray.by

Нядаўна ў спецшколе-інтэрнаце адбылося спартыўнае свята “Дзень здароўя”. Каманды “220 V” і “АТАС” актыўна ўдзельнічалі ў прапанаваных эстафетах. У журы ўвайшлі інструктары-метадысты па фізкультурна-аздараўленчай і спартыўна-масавай рабоце ФСК “Алімпія” Ганна Ладыгіна і Дар’я Цяслюк. Перамагло сяброўства. Суддзі ўручылі ўдзельнікам гульні дыпломы і перадалі ўсім рабятам падарункі.

* * *

У пятніцу ў ГЦК “Ровесник” прайшло заключнае мерапрыемства раённай інклюзіўнай акцыі “Дарогаю дабра”, прысвечанай Году народнага адзінства. У яе рамках былі ажыццёўлены чатыры праекты, якія далі магчымасць удзельнікам раскрыць свае таленты, унутраны свет, пазначыць сацыяльны статус.

На ўдзел у інклюзіўным дыстанцыйным конкурсе відэаролікаў “У адзінстве наша сіла” было пададзена 16 заявак па дзвюх катэгорыях: індывідуальная і калектыўная работа.

Другім праектам былі серыі майстар-класаў, дзе ўдзельнікі акунуліся ў свет дэкаратыўна-прыкладнога мастацтва і тварылі цуды сваімі рукамі.

Фотавыстава “Свет асаблівых людзей” — сумесная работа фотамастакоў Наталлі Жмуранковай, Антаніны Трыфанавай і мадэлей — навучэнцаў спецшколы і наведвальнікаў райцэнтра сацыяльнага абслугоўвання насельніцтва. Праект уяўляе сабой серыю з 20 фотаработ. Здымкі расказваюць пра жыццё дзяцей, іх захапленні і паездкі. Па заканчэнні мера-прыемства выставачныя фота былі ўручаны выдатным мадэлям.

У рамках раённай інклюзіўнай акцыі таксама праводзіўся дыстанцыйны творчы конкурс для інвалідаў “Ажыццяві мару”, які праходзіў другі год запар па намінацыях вакальнае майстэрства, тэатральнае майстэрства, танец і мастацкае чытанне. Сёлета ў ім прыняў удзел 31 канкурсант.

Пераможцы ўсіх чатырох праектаў атрымалі заслужаныя ўзнагароды.