У сырным каралеўстве

Іна Заскевіч.

i.zaskevich@gzt-akray.by

Сёння сыр можна лічыць адным з прадуктаў паўсядзённага спажывання большасці жыхароў нашай краіны. З ім гатуюць усё: курыцу, бульбу, макароны, памідоры, суп, пірагі, салаты — можна пералічваць бясконца. І вельмі прыемна, што значная доля запатрабаванай прадукцыі вырабляецца на мясцовым прадпрыемстве, а яго стварэннем займаюцца нашы родныя, знаёмыя, суседзі.

Пацікавіліся поспехамі філіяла “Асіповіцкі” ААТ “Бабушкина крынка”. І парадаваліся разам з вытворцамі. А нагода для радасці і гонару ёсць. Мяркуйце самі. Сёння філіял выпускае каля 50 найменняў смачнага і карыснага прадукту. Штомесяц выдаюць 300 т паўцвёрдых сыроў, каля 20 т мяккіх і да 200 т сыркоў глазураваных. Даволі ўнушальны аб’ём!

У канцы мінулага года пачалі выпускаць два новыя віды сыроў: “Моzzarella” і “Буррата”. Сёлета на прылаўках з’явіліся паўцвёрдыя сыры “Корона Артура”, “Барон Мюнхгаузен”, “Печать Кардинала” и “Parmeciano Cezare”. Выпуск той ці іншай прадукцыі абумоўлены, у першую чаргу, выбарам патэнцыяльных пакупнікоў, пастаянна вядзецца маніторынг попыту насельніцтва ў сырах з рознымі спажывецкімі характары-стыкамі. Выпускаюць тое, у чым упэўнены: прадукт спадабаецца. Аб слушнасці разлікаў сведчаць і ўзнагароды. У конкурсе “Лепшая прадукцыя года-2021” ААТ “Бабушкина крынка” — упраўляючая кампанія холдынгу “Магілёўская малочная кампанія “Бабушкина крынка” стала ўладальнікам Гран-пры за стабільную якасць, а 22 малочныя прадукты ўдастоены дыпломаў пераможцаў. Сярод іх нашы “Весёлые внучата” з какосавай стружкай і напаўняльнікам “мак-разынкі-бісквіт”, а таксама сыр мяккі “Моzzarella” і сычужныя “Лангре”, “Черный Графъ”.

Днямі на 27-й Міжнароднай спецыялізаванай оптавай выставе-кірмашы “Продэкспо-2021” адбылося ўзнагароджанне лепшых прадпрыемстваў. Асіповіцкі сыр “Буррата” атрымаў гран-пры, а глазураваныя сыркі — перамогу ў сваёй намінацыі.

Цэлы калейдаскоп узнагарод прывезлі асіпаўчане і з Міжнароднага конкурсу “Лепшы прадукт-2021”.

Спецыялісты філіяла працуюць над удасканальваннем вытворчых тэхналогій і рэцэптуры, а яшчэ робяць усё для таго, каб ісці ў нагу з часам. Напрыклад, набылі спецыяльнае абсталяванне для нанясення на кожную ўпакоўку QR-кодаў і ўкаранілі сістэму аўтэнтыфікацыі, што абараняе прадукцыю ад фальсіфікацыі. А яшчэ на прадпрыемстве ўстанавілі новую сістэму кандыцыяніравання паветра, што палепшыла ўмовы працы калектыва.

Дарэчы, часопіс “ПРОДУКТ.BY” вырашыў паказаць, хто стаіць за поспехамі беларускай малочнай галіны, і ў рамках VII экспартнага форума “Беларусь малочная” арганізаваў конкурс “Большие звезды млечного пути”. У ліку 15 яго пераможцаў аказалася і намеснік дырэктара па вытворчасці і якасці філіяла “Асіповіцкі” ААТ “Бабушкина крынка” Святлана Грэчная. Усе яны   атрымалі дыпломы і фотасесію, якая рэкламавала вырабляемую прадукцыю. Сімвалічна, што Святлана Пятроўна з упакоўкамі сыроў асіповіцкай вытворчасці размясцілася на крыле самалёта. Прадукцыя асіповіцкіх сыраробаў, насамрэч, разлятаецца ў розныя кропкі планеты і ўсюды карыстаецца попытам.

* * *

Віталій і Уладзіслаў Каваленкі вельмі цэняць пастаянства. Ва ўсім: рабоце, адносінах, перавагах, месцы пражывання… У Асіповіцкім філіяле ААТ “Бабушкина крынка” яны карыстаюцца заслужанай павагай за гэтыя якасці. А яшчэ — за высокі прафесіяналізм.

Уладзіслаў працуе сырасолам. Яго работа — толькі адзін з этапаў у доўгім ланцужку працэсу ператварэння малака ў зусім іншы прадукт.

У кожны з 10 кантэйнераў з расолам змяшчаюць па 2 тоны сыру. Яны знаходзяцца ў салёнай вадзе ад 36 да 72 гадзін (у залежнасці ад віду). Калі сыходзіць адведзены час, сырасол выкладае галоўкі на спецыяльныя стэлажы, а потым адпраўляе іх на абсушку. А ўжо пазбавіўшыся злішкаў вадкасці, сыр паступае ў вакуумную ўстаноўку. Там ад брата эстафету пераймае Віталій, які працуе машыністам вакуумна-упаковачнай машыны. Ён накіроўвае атрыманы прадукт у камеру выспявання на 35-90 сутак, а ўжо потым сыр запакоў-ваецца ў карабы і накіроўваецца ў камеру гатовай прадукцыі.

Браты Каваленкі — не толькі сырадзелы. Яны блізняты, добрыя таварышы і любячыя ўнукі. Дарэчы, іх бабуля Таісія Яраславаўна Каваленка — старэйшы жыхар Асіповіччыны: летам ёй споўніўся 101 год.