З МАКСІМАЛЬНАЙ КАРЫСЦЮ

пастаралася правесці 24 жніўня на Асіповіччыне дэпутат Палаты прадстаўнікоў Нацыянальнага сходу краіны: напачатку Святлана Шутава прыняла актыўны удзел у рабоце пастаянна дзеючых камісій раённага Савета дэпутатаў, потым правяла прамую тэлефонную лінію з жыхарамі рэгіёна і прыём грамадзян па асабістых пытаннях, а ў другой палове дня наведала асіповіцкі філіял ААТ “Бабушкіна крынка” і раённы цэнтр сацыяльнага абслугоўвання насельніцтва.

На пасяджэнні сваіх камісій дэпутаты райсавета разгледзелі пытанні “Аб выкананні бюджэта раёна за 7 месяцаў 2021 года”, “Аб рабоце ўстановы “Рэдакцыя раённай газеты “Асіповіцкі край” па асвятленні пытанняў жыццязабеспячэння насельніцтва раёна” і “Аб сумеснай рабоце аддзела землекарыстання Асіповіцкага райвыканкама і сельскіх выканаўчых камітэтаў па эфектыўнаму і рацыянальнаму выкарыстоўванню зямель”, з якімі адпаведна выступілі намеснік начальніка фінансавага аддзела райвыканкама Наталля Казянкова, галоўны рэдактар “раёнкі” Валянціна Корбаль і начальнік аддзела землекарыстання райвыканкама Наталля Мастыка. А парламентарый, пасля ўдакладнення шэрагу момантаў па ўгаданых накірунках, праінфармавала прысутных наконт будзённай дзейнасці Палаты прадстаўнікоў і сённяшней сацыяльна-палітытычнай абстаноўкі ў краіне, адказала на цікавячыя мясцовых дэпутатаў пытанні.

Што тычыцца прыёму грамадзян і “гарачай” лініі, то людзі, як звычайна, звярталіся да Святланы Аляксандраўны з самым розным — наконт паляпшэння жыллёвых умоў, ільгот ветэранам Міністэрства ўнутраных спраў, набыцця паколатых дроў, магчымасці пабываць з экскурсіяй у Авальнай зале Дома ўрада, перагляду межаў зямельнага ўчастка і інш. Па шэрагу праблемных момантаў землякі атрымалі адказ адразу, па асобных тлумачэнні ім будуць дадзены пасля ўдакладнення.

Пра высокую якасць выпускаемага нашымі масларобамі прадукту вядома даўно і па-за межамі Беларусі, а вось пабачыць на свае вочы, як малако ў яго ператвараецца, удаецца не кожнаму. І кіраўнік асіповіцкага філіяла Дзяніс Ліннік з задавальненнем пазнаёміў парламентарыя з вытворчасцю, падрабязна расказаў Святлане Шутавай і старшыні райсавета дэпутатаў Сяргею Сувееву пра паўсядзённыя справы калектыву і перспектывы. Як і дырэктар райцэнтра сацабслугоўвання насельніцтва Ірына Вірмаускене, якая паведаміла і аб будзённай працы, і пра немалыя задумкі на будучыню.

…Вядомая ісціна: калі чалавек зацікаўлены ў належным выніку, калі ён стараецца зрабіць што мага лепш, то не займаецца пустой балбатнёй, а рэальна робіць усё магчымае для дасягнення пастаўленай мэты.

Віталь КУЛАКОЎ.