У канцы мінулага тыдня на Асіповіччыне прайшоў выязны рэспубліканскі семінар-вучоба “Дзень аховы працы на базе прадпрыемстваў жыллёва-камунальнай гаспадаркі Бабруйскага і Асіповіцкага раёнаў Магілёўскай вобласці”

Іна Заскевіч.

i.zaskevich@gzt-akray.by

Удзельнікаў мерапрыемства — а гэта былі прадстаўнікі Міністэрства жыллёва-камунальнай гаспадаркі, Дэпартамента дзяржаўнай інспекцыі працы Міністэрства працы і сацыяльнай абароны краіны, Рэспубліканскага камітэта Беларускага прафсаюза работнікаў мясцовай прамысловасці і камунальна-бытавых прадпрыемстваў, дзяржаўных аб’яднанняў “Жыллёва-камунальная гаспадарка”, старшыні і тэхнічныя інспектары працы абласных камітэтаў прафсаюза, Мінскага гарадскога камітэта прафсаюза і іншыя — асіпаўчане сустрэлі на Алеі Герояў. Па традыцыі паднеслі гасцям хлеб-соль, а народны калектыў “Люлечка” вітаў песнямі.

Госці аддалі даніну памяці героям вайны і працы Асіповіччыны і пазнаёміліся з работамі па добраўпарадкаванні, якія былі праведзены ў гарадскім парку. У прыватнасці, многіх зацікавіла тэхналогія ўкладкі тратуарнай пліткі вытворчасці філіяла “АЗЖБК” ААТ “Дарбудмантажтрэст”. Дырэктар УКП ЖКГ Дзмітрый Кулакоўскі і яго намеснік Сяргей Салавей адказалі на пытанні, якія ўзніклі ў працэсе знаёмства з работай асіповіцкіх камунальнікаў. Было адзначана, што ў рамках падрыхтоўкі да абласнога свята “Дажынкі” праведзены бягучы рамонт пяці дзясяткаў дамоў, яшчэ ў дваццаці запланаваны капітальны рамонт, 17 з іх ужо адрамантаваны. Праводзіцца замена дарожнага пакрыцця, тратуараў, многа ўвагі надзяляецца стварэнню безбар’ернага асяроддзя. Ва УКП ЖКГ створаны ўсе адпаведныя аддзелы, ёсць рабочыя розных спецыяльнасцей, якія адначасова асвойваюць сумежныя прафесіі, што вельмі зручна. Напрыклад, зараз вельмі запатрабаваны дарожныя рабочыя.

Пасля экскурсіі па горадзе ўдзельнікі семінара накіраваліся ў райвыканкам, дзе адбылося пленарнае пасяджэнне, на якім разглядаліся пытанні захавання аховы працы і прамысловай бяспекі ў арганізацыях жыллёва-камунальнай гаспадаркі.