Праект “Насустрач рэферэндуму” рэалізуецца на ААТ “Мінскі аўтамабільны завод” у папулярным фармаце выязной агітбрыгады

Самадзейныя артысты ДК “МАЗ” разам з калегамі-прафесіяналамі праводзяць на прадпрыемствах, якія ўваходзяць у холдынг “БелАўтаМАЗ”, канцэрты і дэманстрацыю найбольш цікавых узораў айчынных грузавікоў. Міні-выстава тэхнікі ўключае экспанаты, якія выклікаюць гонар: самая сучасная мадэль МАЗа і ралійная машына, якая паспяхова ўдзельнічала ў марафонскіх гонках “Дакар”.

Асіповіцкі завод аўтаагрэгатаў — першы пункт за межамі сталіцы, куды накіравалася галіновая агітбрыгада. Канцэрт, які прайшоў учора непасрэдна ў адным з цэхаў, завадчанам спадабаўся. І, канечне, не пакінуў іх абыякавымі заклік намесніка дырэктара ААТ “МАЗ” па сацыяльных пытаннях і ідэалагічнай рабоце Дар’і Цімафеевай аб актыўным удзеле кожнага машынабудаўніка ў рэспубліканскім рэферэндуме па ўнясенні змяненняў і дапаўненняў у Асноўны закон нашай краіны.