Няхай полымя гарыць толькі ў печы

Адна з найважнейшых задач кожнага сельсавета — папярэджанне пажараў: ад гэтага залежыць здароўе, а зачастую і жыццё насельніцтва.

Пры Градзянскім сельвыканкаме працуе аглядавая камісія з 15 чалавек, у склад якой увайшлі работнікі розных сфер дзейнасці, што цалкам апраўдана, бо ў кожнага ёсць свая мэтавая аўдыторыя. Так, педагогі маюць пастаянныя ўзаемаадносіны з мнагадзетнымі сем’ямі, прадстаўнікі медустаноў цесна працуюць з сем’ямі, у якіх растуць маленькія дзеці або пражываюць інваліды, сацработнікі наведваюць адзінокіх і  адзінока пражываючых пенсіянераў.

Асноўная задача аглядавай камісіі — вывучэнне супрацьпажарнага стану жылых дамоў і правядзенне інфармацыйнай работы. А яшчэ аказанне дапамогі. Дарэчы, тэрыторыя сельсавета ўключае 8 населеных пунктаў. У 380 домаўладаннях пражывае 712 чалавек, 203 з якіх знаходзіцца на асобным кантролі.

Сёлета абследавана 486 домаўладанняў, у якіх пражывае 12 шматдзетных сямей; 28 сямей, дзе выхоўваюцца непаўналетнія дзеці; 3 сям’і, што знаходзяцца ў сацыяльна небяспечным становішчы; 18 адзінокіх і 105 адзінока пражываючых састарэлых; 9 інвалідаў; 27 асоб, якія злоўжываюць спіртнымі напоямі.

Аглядавая камісія сёлета выявіла 52 парушэнні. Але мэта сельвыканкама не паўшчуваць жыхароў, а не дапусціць бяды. Напрыклад, было ўстаноўлена, што ў 21 домаўладанні неабходна адрамантаваць печы; у 2 замяніць электраправодку; у 20 размясціць АПА і ў 9 замяніць элементы сілкавання пажарнага апавяшчальніка. У Градзянцы ёсць мясцовыя печнікі, адрасы і тэлефоны якіх члены сельвыканкама паведамляюць тым, хто мае патрэбу ў іх паслугах. Кантакты электрыкаў таксама заўсёды напагатове, ёсць каму адрамантаваць або замяніць аджыўшую свой век праводку.

Па выніках праверак аглядавая камісія накіроўвала пісьмы родным пенсіянераў, у органы пажарнага нагляду, унутраных спраў і г.д. для прыняцця адпаведных мер і садзейнічання. У выніку адну жыхарку, якая па стане здароўя ўжо не можа сябе даглядаць, змясцілі ў Дараганаўскую бальніцу сястрынскага догляду.

Немалую ролю ў прафілактычнай рабоце з насельніцтвам адыгрывае сельскі актыў. Старшыня сельсавета Галіна Кірыновіч выдзяляе старасту Лазовага Наталлю Стэльмах, Цэзарова — Валянціну Ганчаронак, дырэктара школы Алену Міхайлоўскую, членаў выканкама Галіну Цалкоўскую і Леаніда Дражына, дэпутата раённага Савета дэпутатаў Віктара Шэўчанку, якія нераўнадушныя да лёсу населеных пунктаў і жыцця іх насельнікаў, заўсёды аказваюць пасільную дапамогу ва ўсіх справах. Добрым словам у сельсавеце адзываюцца пра супрацоўніцтва з праваахоўнымі органамі. Участковы інспектар Уладзіслаў Сідараў і намеснік начальніка РАУС Андрэй Бабіч частыя госці населеных пунктаў, ведаюць, якія праблемы хвалююць іх жыхароў. А многія мерапрыемствы праводзяцца сумесна з РАНС. Напрыклад, нядаўна ў інтэрактыўнай форме прайшла вучоба па супрацьпажарнай бяспецы з удзелам асацыяльных асоб.

Практыка паказвае, што ў зімовы перыяд найбольшую небяспеку прадстаўляе пячное ацяпленне, а летам — лясныя пажары. З насельніцтвам праводзяцца адпаведныя гутаркі. Тлумачальная работа датычыцца недапушчэння спальвання сухой расліннасці, смецця, наведвання лясоў у перыяд забароны, курэння ва неўстаноўленых месцах, развядзення кастроў у лесе. А вакол Лазовага, Градзянкі, Градзянца, Асаўка, якія мяжуюць з лясным масівам, работнікі лясніцтва зрабілі мінералізаваныя палосы для аховы ад пажараў.

За апошнія гады на тэрыторыі сельсавета адзначаецца дынаміка зніжэння пажараў і гібелі людзей ад іх. Аднак сёлета ў студзені загарэўся двухкватэрны дом па прычыне няспраўнага ацяплення. А ў кастрычніку адбылося непапраўнае: 54-гадовы жыхар Градзянкі пасля прыняцця “гаючага” напою заснуў з запаленай цыгаркай у руцэ і загінуў. “Крыўдна, — зазначае старшыня. — За некалькі гадзін да трагедыі мы наведалі гэтага чалавека, пагутарылі з ім. Але той не зрабіў ніякіх высноў”.

Пажарную небяспеку могуць прадстаўляць і пустуючыя дамы. Каб асацыяльныя асобы не збіраліся там з негатыўнымі мэтамі, работнікі сельсавета забіваюць вокны дошкамі. Дарэчы, у гэтым годзе ліквідаваны 4 пустуючыя дамы, у тым ліку 2 — праз рашэнне суда.

“Бяду адводзь да ўдара, а іскру тушы да пажара”, — вучыць народная мудрасць. Не шкодзіла б да яе прыслухацца кожнаму.