Менавіта дадатковай нагодай у чарговы раз надзяліць увагай людзей, якія маюць сур’ёзныя праблемы са здароўем, можна назваць Дзень інвалідаў. У аўторак, 3 снежня, утульная зала РЦК і сабрала асіпаўчан пераважна гэтай катэгорыі.

Намеснік старшыні райвыканкама Аляксандр Шаўлюга пажадаў прысутным найперш здароўя і сілы духу: калі чалавек не паддаецца жыццёвым нягодам, то і цяжкасці адступаюць. За шматгадовую плённую працу, дасягненне высокіх вытворчых паказчыкаў Аляксандр Вікенцьевіч уручыў Ганаровыя граматы райвыканкама тэхнолагу УВП “Тэхпрам” Магілёўскай абласной арганізацыі ГА “Беларускае таварыства інвалідаў” Жанне Ніамедзі і галоўнаму бухгалтару Алене Шэрамет, Падзячныя лісты старшыні райвыканкама — швачцы 5-га разраду Людвізе Крукоўскай і швачцы-надомніцы Галіне Чыжанок. Прадстаўнікі “Тэхпрама”, у сваю чаргу, расказалі прысутным аб сваёй рабоце і запрасілі тых, каму дазваляе здароўе, працаўладкоўвацца менавіта сюды.

Не сакрэт, што пазітыўны настрой паляпшае агульнае самаадчуванне. Праз свае яркія нумары і змаглі падарыць прысутным часцінку дабрыні і цеплыні самадзейныя артысты з суседняга Бабруйска — у госці завіталі ўзорны харэаграфічны калектыў “Очаровашки” і эстрадная студыя “Жемчужинка” Цэнтра дадатковай адукацыі дзяцей і моладзі “Росквіт”.

Наогул мерапрыемствы, прымеркаваныя да Дня інвалідаў, праходзілі не толькі ў гэты дзень. Напрыклад, у суботу ў актавай зале гімназіі сабраліся выхаванцы Цэнтра карэкцыйна-развіваючага навучання і рэабілітацыі і дзеці-інваліды з усяго раёна, якіх на Асіповіччыне каля паўтары сотні. Арганізацыяй сустрэчы займаўся ЦКРНіР, а цікавую праграму падрыхтаваў Цэнтр творчасці дзяцей і моладзі. Прыходзілі ў гімназію і наведвальнікі аддзялення дзённага знаходжання інвалідаў Цэнтра сацабслугоўвання насельніцтва. Прычым, не толькі ў якасці гледачоў: яны таксама паказалі выступленне. Дзякуючы сродкам, якія выдаткавалі многія нашы прадпрымальнікі, кожнае дзіця атрымала салодкі падарунак і садавіну.

У панядзелак гульнёвая праграма для дзяцей-інвалідаў прайшла ў РЦК. І зноў не абышлося без сюрпрызаў — тут спонсарам выступіла кампанія “Амега”.

Не засталіся ўбаку і валанцёры. Так, ЦКРНіР наведвалі вучні СШ № 4, а спецшколу-інтэрнат — члены БРСМ з СШ № 1. Паўтара дзясятка старшакласнікаў спецшколы ў гэтыя дні ўступілі ў маладзёжную суполку — свайго роду прызнанне іх правоў і жадання быць нараўне з другімі.

Словам, шмат добрых спраў было прымеркавана ў раёне да гэтага дня. І хоць міласэрнасці і спагады ў землякоў многа, аднак кожнаму варта яшчэ ў большай ступені клапаціцца аб здароўі і сваім, і блізкіх людзей.