У дварах дамоў нярэдка можна сустрэць людзей, якія гуляюць з сабакамі. Жывёл выводзяць на прагулку двойчы на дзень, каб яны маглі пабегаць і справіць натуральныя патрэбы, месцам для чаго часцей за ўсё становяцца бліжэйшыя газоны і дзіцячыя пляцоўкі.

Трымаць у кватэры сабаку ці не — пытанне прыватнае. Але тым, хто завёў чатырохногага сябра, трэба памятаць, што існуюць “Правілы ўтрымання хатніх сабак, кошак, а таксама адлову безнаглядных жывёл у населеных пунктах Рэспублікі Беларусь”, зацверджаныя Саветам Міністраў краіны 4 чэрвеня 2001 г. № 834. Згодна з дакументам, уладальнікі жывёл павінны строга захоўваць санітарна-ветэрынарныя нормы, забяспечваць бяспеку людзей і не дапускаць забруджвання агульнадаступных месцаў. У адной кватэры можа жыць максімум два сабакі, а вось у прыватным доме колькасць хвастатых гадаванцаў не абмяжоўваецца, галоўнае — захоўваць санітарыю і зрабіць усім прышчэпку ад шаленства.

Заканадаўства прадугледжвае абавязковую рэгістрацыю кошак і сабак, незалежна ад таго, дзе яны пражываюць. Як праінфармавалі ў вытворча-тэхнічным аддзеле УКП ЖКГ, зрабіць гэта трэба на працягу трох дзён з дня набыцця дарослай асобіны, а шчанюкоў і кацянят — ва ўзросце 3-3,5 месяца. Неабходна паведамляць у адпаведную службу і пра смерць чатырохногага сябра, калі такое здарыцца. Па-першае, у камунальнікаў павінны быць дакладныя звесткі аб колькасці хатніх жывёл у раёне, па-другое, гаспадарам будуць штоквартальна налічвацца падаткі: за ўтрыманне сабак байцоўскіх парод — у памеры 40,5 рубля, за астатніх — 8,1. Гэта сума адлюстроўваецца ў ведамасці па аплаце паслуг ЖКГ. Ад дадзенага падатку вызваляюцца непрацуючыя пенсіянеры і інваліды І і ІІ груп, якія пражываюць асобна ад іншых дзеяздольных членаў сям’і, а таксама жыхары ўласных дамоў. А вось за катоў плаціць не трэба.

Не ўсе аматары чатырохногіх гадаванцаў законапаслухмяныя грамадзяне. Між іншым, штраф за ігнараванне падатку дасягае 15 базавых велічынь.

Яшчэ болей праблем з выгулам сабак. Выводзіць жывёліну з дому неабходна толькі на кароткім павадку і ў намордніку (для шчанят да 3 месяцаў і дэкаратыўных парод да 25 см у карку наморднік не абавязковы). А гуляць з сябрам дазваляецца на трох “узаконеных” пляцоўках, якія знаходзяцца непадалёк ад спецшколы-інтэрната, у двары дома 26 па вуліцы Сацыялістычнай, на перасячэнні вуліц Крыловіча і Юбілейнай. Наведалі гэтыя месцы, але нідзе не сустрэлі “сабачатнікаў”. Зразумець іх можна: ці ж хочацца здзяйсняць штодзённыя прагулкі на адлегласць некалькі кіламетраў ад дома дзеля патрэб шчаняці? Такое можа дазволіць сабе толькі той, хто не працуе і не абцяжараны хатняй работай. А яшчэ мае завышаны ўзровень грамадзянскай адказнасці. Большасць жа задавальняецца прагулкамі каля ўласнага пад’езда з усімі выцякаючымі адсюль наступствамі ў выглядзе прадуктаў жыццядзейнасці гадаванцаў. Лагічным у дадзенай сітуацыі было б убіраць за жывёламі, але клапатлівых гаспадароў сабак з мяшэчкамі і саўкамі сустракаць чамусьці не даводзілася. Таксама як і чуць пра выпадкі атрымання штрафу за, так бы мовіць, неэстэтычныя паводзіны.

Не ўсе аматары сабак спраўляюцца з абавязкамі па іх доглядзе, з-за гэтага частка хатніх жывёлін з цягам часу ператвараецца ў беспрытульных, якія бегаюць па вуліцах у пошуках ежы, палохаючы прахожых. І ствараюць пагрозу ім.

Абсурдна, але на жывёл, якіх калісьці лашчылі і песцілі, жыхары пішуць заявы ў міліцыю, райвыканкам, УКП ЖКГ, тэлефануюць у рэдакцыю газеты. І камунальнікам даводзіцца ўжо не ставіць на ўлік, а думаць, як знішчыць небяспечных “бамжоў”. Выклік машыны спецпрадпрыемства, якое займаецца адловам бяздомных жывёл, — працэдура вельмі дарагая, таму работнікі УКП ЖКГ самі па меры магчымасці займаюцца адстрэлам сабак, якія з-за чэрствасці гаспадароў сталі нікому не патрэбнымі…

 Каб не даводзілася такім радыкальным метадам змагацца з беспрытульнымі жывёламі, варта дэталёва прааналізаваць свае жыллёвыя ўмовы і магчымасці ўласнага штодзённага клопату пра безабаронную істоту, каб не загубіць яе. Мы ў адказе за тых, каго прыручылі! Банальна, але ў дадзеным выпадку вельмі дакладна.

Іна Заскевіч.

i.zaskevich@gzt-akray.by