На мінулым тыдні адбылося пасяджэнне Савета райаб’яднання прафсаюзаў, у якім прыняў удзел старшыня абласной арганізацыі Беларускага прафсаюза работнікаў дзяржаўных і іншых устаноў Мікалай Загорскі.

Удзельнікі заслухалі справаздачу старшыні райаб’яднання Дзмітрыя Куліка аб рабоце за мінулы год і задачах на бягучы. Было адзначана, што праводзіцца мэтанакіраваная дзейнасць па выкананні рашэнняў VIII з’езда Федэрацыі прафсаюзаў Беларусі, а таксама Праграмы дзейнасці ФПБ. На працягу мінулага года прафсаюзы Асіповіччыны правялі шэраг маштабных мерапрыемстваў і акцый, накіраваных на процідзеянне незаконнай санкцыйнай палітыцы, сабралі больш за сем тысяч подпісаў аб нязгодзе з увядзеннем эканамічных санкцый.

Райаб’яднанне прыняло ўдзел у разглядзе і накіраванні ў ФПБ каля 150 праектаў актаў заканадаўства, якія датычаць працоўных і сацыяльна-эканамічных правоў і інтарэсаў грамадзян. Большасць з іх былі ўлічаны распрацоўшчыкамі.

На пастаянным кантролі знаходзіліся пытанні своечасовасці выплаты зарплаты, няпоўнай занятасці насельніцтва і г.д. Ажыццяўляўся маніторынг цэн па 89 пазіцыях прадуктаў харчавання і 50 — лекавых сродкаў. Працягвалася работа па процідзеянні распаўсюджванню каранавіруснай інфекцыі, матэрыяльнай падтрымцы працоўных ва ўмовах пандэміі. Стымулявалі праходжанне работнікамі вакцынацыі.

У снежні-студзені райаб’яднанне прафсаюзаў актыўна ўключылася ў абмеркаванне праекта Асноўнага закона ў працоўных калектывах.

У выніку абмеркавання работы Савет райаб’яднання прафсаюзаў прыняў шэраг рашэнняў, у ліку якіх падключыцца да мерапрыемстваў па захаванні і ўмацаванні адзінства, фарміраванні аб’ектыўных адносін да гістарычнага мінулага беларускага народа; усім прафсаюзным пярвічкам арганізаваць мэтанакіраваную дзейнасць у сувязі з аб’яўленым ФПБ Годам якасці ў рабоце, а таксама далучыцца да ініцыятывы ФПБ “Мы разам — за Беларусь!” у падтрымку рэферэндуму.